「一定係你要求太高先會變剩女啦！」
有時唔一定係因為要求高，先搵唔到對象。更多時候係因為遇唔到啱Feel嘅人、又或者同對方相處得唔好、遇人不淑等問題先會冇拖拍，唔可以一概而論批判對方要求高先落得如斯田地。

「點解你仲係單身架？」
其實如果對方知道呢題嘅答案，咁佢應該唔會單身，會尋求所有解決方法令自己有拖拍囉。而且作為一個女士，你想人哋點答你呢條問題？話你知佢過去每段情史，等你可以好好分析點解佢會單身？如果你嘅意思係呢位女士條件咁好，點解到而家都仲會係單身，咁你最好只係稱讚佢，唔好問後面條問題，勾起佢嘅傷心事。

「個男人同你分手，係佢冇福氣啫！」
好多時分手之後，身邊嘅朋友都會話︰「係條仔唔識貨」、「係個男人冇眼光」、「係個男人冇福氣」等等說話嚟安慰人，但其實單身女士聽到呢啲說話，並唔覺得被安慰到，反而會諗︰如果我真係咁好，佢點會揀分手？！

「妳要多啲出去識吓人嘛！」

你又知我冇努力過去識人？有試過朋友介紹、參加Event、Speed Dating、交友App等等途徑，咪又係冇著落！我咁仲唔叫努力去識人咩？？

「再唔搵個男人嫁，第日就生唔出架喇……」
呢句真係超易激嬲單身女性！首先，鬼唔知有仔襯嫩生咩？都要有對象同自己結婚先得架？我又唔係要同你生，我生唔生得出關你鬼事咩？而且你又知我想生仔？生仔咁辛苦，我唔可以唔生嘅咩？