文青親身遊 - 尖東海賊王3D展

文：MenClub 魏文青　　
POSTED ON 02 Nov 2015

尖東，曾經係一個活色生香、夜夜笙歌嘅煙花之地，但面對內地同業競爭，各大夜總會執嘅執、搬嘅搬，到2012年「大富豪」同「新花都」兩大地鋪夜總會結業，尖東正式告別燈紅酒綠，近年仲黎個華麗轉身，成為一家大細(以及鄰近經濟體遊客)週末消閒好去處！例如喺「新花都」舊址樓下，即係尖東希爾頓大廈一樓，近年就開咗個「香港3D奇幻世界」，入面好光猛、冇酒飲，不過一樣有女女－－只係個女女叫「娜美」同「羅賓」咁解啫！
每個男人都會做呢個Pose架啦，扮咩呀你哋！以香港景點為背景嘅限定畫作
因為佢依家搞緊個號稱全球第一個嘅「《海賊王》3D展」嘛！準確啲講，第一階段早於今年4月尾開始，但九月經過裝修之後就推出第二彈，除咗原有嘅「空島」、「再見梅利號」、「艾斯之死」等等經典場面，仲有「3D2Y」、「龐克危地(Punk Hazard，即係打凱撒嗰到)同「德雷斯羅薩篇」等等新場景。換言之即係會見到羅、明哥、凱撒以至「2Y」後嘅烏索普、法蘭奇等等人物！ Well，咁始於唔係講緊「社麗沙夫人蠟像館(#曲線寫到明)」，淨係講咩人物係冇意思嘅，最重要都係睇下佢個所謂「3D場景」有幾3D嘛！
第二彈新增加嘅場景
其實以文青去過，日本台場類似嘅3D展黎做比較，香港呢個其實都算係水準之作。場景有心思，作畫冇崩壞，每個場景前都有「最佳攝影位置標示」，又有示範圖教你點擺Pose，仲有唔同道具過你玩(例如我心口個火拳)。唯一嘅問題都係「土地問題」，因為場地太細而某啲場景又太過近，結果個「最佳位置」就有可能互相遮住對方。解決方法？大家都好清楚啦？包容！認讓！和諧！
當然啲經典場面都係要影嘅
行完個場景，當然唔少得紀念品店。老老實實文青每次去親呢啲地方都係頭也不回就直接行出去，但今次嘅海賊王3D展推出咗唔少香港限定嘅產品。除咗一套九款嘅香港版明信片，文青最推薦嘅就係呢套3D海報！雖然說穿了佢都係我哋細個玩嗰啲一條條直紋、搖下個頭會見到「立體影像」嘅膠卡，但呢套真係做得好靚！最起碼唔會一半清、一半濛先！尤其是個娜美真係立體到呢！

至於最重要嘅問題：抵唔抵去？正價入場票盛惠大拿拿$149，目前做緊預售特價，平少少要$128，仲送「海賊王終極秘寶一份」，當中包括第一階段好多人想要都要唔到嘅「3D梅利號」，如果你本身係《海賊王》粉絲，去影相擺上Facebook/Instagram呃Like係值嘅！咁有冇再抵啲方法？緊係有！即刻黎MenClub Forum答啱問題，就有機會得到「香港3D奇幻世界」送出嘅入場門票一套兩張！
「香港3D奇幻世界」海賊王3D展地址：香港九龍尖沙咀東加連威老道96號希爾頓大廈1樓開放時間：上午10時至下午10時門票：成人 - 港幣$149 小童(3-11歲) 及學生(須出示有效學生證明) - 港幣$98 長者(65歲或以上) - 港幣$100 網站：www.hk3dm.com.hk Facebook：www.facebook.com.hk/hk3dmuseum