「早知冇飯食，我就約Friend啦……」、「早知佢冧我，我就表白啦……」、「早知會落雨，我就帶遮啦……」雖然好多人都咬牙切齒話自己人生過得無悔，但心底裡，真係完全冇「早知點點點，我就點點點」呢句對白出現過？好多嘢，我哋說不上感到後悔，但如果可以早一步知道，咁就更加好。問問心，你覺得直到呢一刻為止，自己嘅人生過成點？有冇一刻有過「早知」嘅念頭？有冇咩嘢，你覺得年少時早啲知道就更好呢？

投資家、編程人員、作者，同時亦係企業家嘅James Altucher就寫咗一篇文，關於佢22歲時就希望知道嘅事情，而以下呢篇文章，就係想畀一眾22歲嘅年輕人一點點忠告。

文章裡面，James同大家講，22歲後，會有遇到好多開心同唔開心嘅事，面對種種挑戰，要點先可以變成一個處事冷靜又不失開朗嘅大人呢？重點有3個︰

1.開發個人潛能
2.同身邊嘅人建立良好關係
3.盡可能令自己心態更「自由」

好，其實頭1、2點都唔係James想同大家講嘅重點，佢主要想講嘅，係第3點——令自己更「自由」。呢度講嘅，唔係話想做乜就做乜，想去邊就去邊，而係一種類似豁達嘅心態。就咁講好似好難明，但細心諗，你有錢時，就會怕冇咗啲錢；你有良好關係時，就會怕關係被破壞。再具體啲咁講，面對自己重視或者敬重嘅人，佢每句說話都會左右你嘅心情︰當佢稱讚你，你會覺得開心；當佢責備你，你會覺得唔開心，彷彿自己嘅心完全被外物同外人所操控咁，而自己就一啲主導權都冇，呢種心態上嘅自由，係你去幾多旅行都補唔返。

所以James好堅持，任何情況下都唔好畀權力別人或事物去操控自己內心，咁先可以得到真正嘅自由。點解James咁強調「自由」兩字？因為只有對任何事都睇得開，先唔會被身邊各種好壞嘅事情影響你人生。

James喺文中叫大家試諗下，假設你對現狀非常不滿，你唔鍾意你另一半、做所有事情都失敗、害怕作出任何嘗試，但當你撇除呢啲唔好嘅事，你人生會剩低咩嘢？就係剩低你自己。你冇變到，都係你自己，只係你再冇呢啲負面想法。唔係要你去忘記你所面對嘅事，而係要你放下，唔再被糾纏，因為每日都係新嘅一天，你永遠無法預測明天會有咩事發生，所以只需要認清今時今日嘅自己，自己係點嘅人，自己想點，唔好再被過去束縛自己。

雖然大家心入面會諗，邊有咁易拋棄過去，你今時今日得到嘅技能，都係過去所學；你認識嘅人，都係過去遇見；你將大量時間都分配畀過去嘅ABCD事上，冇得聽James所講，話豁達就豁達。啱丫！所以James唔係要22歲嘅年輕人聽佢講，照聽照做，同機械人有咩分別呢？重點係要從生活中去學習，面對令你Confused嘅事時，諗諗James嘅說話，學習點去成為大人。

最後James放咗以下呢張圖喺文章作結尾，睇完之後，有冇咩反思？