成日都話，由朝到晚都返工，對同事仲多過對屋企人，更莫講話想happy hour去識「朋友仔」啦～如果你公司啲女同事都見得下人，與其對外覓食，不如食返自己人仲方便喎！雖然話就話「呢度食唔好呢度痾」，最好咪搞辦公室戀情，不過都係「最好」啫，如果有正菜，有食唔食先最大惡極，你唔食，咪盞益咗人，係咪先？

之不過，喺公司有對象都唔代表你食得到，近水樓台的確係優勢，但食得住對方最大因素都係你自己嘅個人魅力，家下就醒你幾招，教你如何喺office吸引女同事，令佢哋對你心動不已。

1.認真工作

「認真嘅男人最Charming」的確唔係假，由細到大，見到身邊成日講笑、Kai Kai地嘅男同學或者男同事突然認真嘅樣，都會覺得佢當下即刻有光環，更何況係一直認真工作嘅男人呢？簡直24小時都有spotlight射住佢啦。

2.適時協助女同事

成日一聽到話幫女仔搬搬抬抬，整下電腦，男人就會覺得自己好似奴隸咁，所以唔太樂意幫助女生。係……的而且確，有啲女仔係好鬼賤，當正自己女神咁，覺得你有機會為佢效勞直頭係榮幸，不過基本上，你唔係咩事都狗衝去幫，仲鬼咁殷勤，應該都唔會咁易觸動到佢自戀嘅神經。Mean娜認為，只要係適當時默默去幫手，正常女同事都會好欣賞你嘅。

3.關心同事

除非你係一個好似痴漢一樣噁心嘅男人，如果唔係正正常常，作為女仔，有人關心自己係一件開心嘅事，話晒大家返公司工作，都有人留意到自己情緒起伏，失意時會安慰自己，開心時會同自己分享，一定會對你留有好印象。

4.工作上有出色表現

好多女仔都鍾意leader型嘅男士，覺得佢好叻，好有大將之風，除此以外，做得帶頭嘅，好多時都要有咁上下實力，試問工作上有好嘅表現，邊個會唔欣賞你丫。