咪以為凡係讚美嘅說話女人一定Buy，就好似讚佢一句︰「你今日好靚！」，都可以畀人黑面話︰「咁即係我平時唔靚啦？」，你就知道，畀人判死刑可以有好多方法……

日本有網站就請咗500位女生做調查，要佢哋揀出「聽到反而唔會開心嘅讚美說話」，雖然男性講時冇諗咁多，可能係單純讚美一下，但估唔到女仔聽落，竟然句句有骨，覺得好受傷害！

第5位　「你好有個性」　22.8%
畀人讚有個性照計應該幾開心，但有部分女性就覺得︰你一定覺得我唔係索靚正冇嘢好讚，所以先讚我有個性啦！

第4位　「你影相好上鏡」　31.4%
呢句說話就同「你今日好靚」一樣，部分女性聽落會覺得，言下之意即係我真人唔靚啦？！

第3位　「你個胸好大」　32.6%
就算你真心咁讚嘆，都唔好真係講出口，好易畀人覺得你係性騷擾，而且會令人認為你有非分之想，柅落好唔舒服，仲會將你定為危險人物！

第2位　「你都賺得幾多」　42.0%
如果係男人，畀人讚賺得多實會高興，但對唔少女性而言，畀人咁講，聽落好似係「你賺咁多，嫁唔出都唔怕啦」，又或者會令女仔覺得對方串緊自己，實係因為做嘢做到癲咗，所以冇時間拍拖等等，總之就係聽落唔舒服。

第1位　「你好識化妝」　52.6%
呢句說話出自女性口，就係真嘅讚美，但出自男性口，就好似話佢化妝靚過素顏好多，再演繹就好似話佢唔化妝就唔見得人咁。