又到咗「街裏愛人一對對」的年尾，仲係孤家寡人嘅你唔想面對呢個情境，有兩個選擇：第一，唔出街、唔見人，努力組織去死去死團詛咒世上所有情侶；第二，把握機會參加朋友、朋友嘅朋友、甚至朋友嘅朋友嘅朋友舉辦嘅Party，結識同你一樣獨守胸圍空幃的異性！

但陳百強都有教「莫道你在選擇人，人亦能選擇你」，冇理由期望一行入個場到啲女就尖叫住撲埋黎！去迪士尼都要做足準備，去一個可能會影響你下半身/生幸福嘅Party又點可以求其？時間有限，要慢慢由零學起就冇可能，但只要你有五分鐘，就應該要細讀以下呢份「脫離單身備忘錄」！

1. 做好身體準備

喂喂喂，望返上黎！呢到講嘅身體準備唔係指你兩腿之間蠢蠢欲動嘅小肉蟲，而係指你嘅外表打扮。

年尾派對永遠都有個主題，可能係「懷舊之夜」、「職業Cosplay」、「卡通動物」甚至最簡單嘅「顏色主題」。太緊、太閃、太搶、太誇嘅嘢你著唔慣冇問題，但作為一個參加者，就好應該喺一個你可以接受的情況下盡量配合主題。如果堅持牛記笠記，仲美其名為「我行我素」，咁恭喜你除咗可以瞬間奪取全場目光，更加會喺所有女士心目留下一個「咁唔想黎咪唔好黎囉！」嘅負面印象。到時唔好話溝女，連斟水都冇你份呀！

所謂人靠衣裝，一個合適而又有品味嘅打扮唔單止令你更有自信，而且可以建立良好的第一印象。如果可以嘅話一個特別嘅小飾物仲可以成為你打開話閘子嘅好道具添！

2. 做好心理準備

第一，你可能會記得「莫道你在選擇人，人亦能選擇你」，但同樣要緊記「莫道人在選擇你，你亦能選擇人」。喺派對中結識新朋友，嚴格上同你喺街市買菜的道理相同。你睇中呢棵芥蘭，人家未必肯賣；同樣地人家想夾硬賣棵芥蘭比你，你亦絕對有權唔買，甚至可以去第二個菜檔、第二個街市買，大家都有選擇權。只不過喺今時今日呢個社會結構下，要行多兩步格價的是男人而已。所以唔需要太有得失心、亦無需要害怕拒絕，睇多幾間先知有冇好嘢架嘛！

第二，唔好抱住「我今日一定要捕捉到一個女人返屋企過年」嘅心態參加任何派對。如果你有呢個諗法，就會有相應的行為。除非你遇上的係未經人事的純情小花，又或者係比你經驗更多、但求順水推舟的老手，否則一般女人都有能力分辨一個男人究竟係「想做佢愛人」定「想做愛嘅人」。當然兩者之間並無對錯之分，但一個單純想「做愛」嘅女人又會唔會係聖誕派對著住套動物衫同你食PIZZA HUT外賣呢？我諗個機會就細啲囉！

3. 做好技術上的準備

外表，有；心理準備，都有；跟住係咩？「開場白」？啱，但係啱唔哂。因為開場白之前仲有一個好重要嘅步驟－眼神接觸。

記得當年Santino教落嘅45度嗎？縱然當年你當笑話咁聽，但實際上係有其道理。好多人一諗識女仔就諗「究竟我要講啲咩」，而遺忘咗開口同佢講嘢之前，你仲需要真真正正「接近」個女仔先可以同佢講到嘢。而喺呢個時候你最應該避免的就是嚇親個女仔，所以背後同正前都唔係一個好角度。最好先在一個安全距離建立一個眼神接觸，確保她看到你，然後再出現喺佢視線的斜前方慢慢接近。

到真正開口的時候，儘量利用身邊的環境做開場白。食物如何？音樂如何？佢手上的又是什麼？佢當時的表情又係點？呢啲話題不單止人畜無害，而且有延伸性。你大可從一件牛肉談起、到各大餐廳、到運動習慣、假日消遣、下一個旅遊地方等等等無數個題目，同時亦可以見縫插針加上一兩個個人意見、經歷讓她對你了解更多。

儘量問一些開放式問題。例如唔好問「你鍾唔鍾意去旅行？」，應該問「你鍾意去邊旅行？」；唔好問「有冇去鳩嗚？」，要問佢「鍾意去邊鳩嗚？」，而且多問「點解？」咁樣不單可以延長對話時間，本身提供的資訊都比較多。更重要的是對女仔黎講，你會問呢類問題代表你好有興趣想了解佢，咁係女仔都鍾意比人了解架啦係咪？

4. 做好下一步的準備

黎到呢個地步，相信你心入面都對呢個女仔有個評分(放心，佢都一定有)，咁就開始要計劃下一步。

好多男士們喺中學時期都犯過嘅錯，就係如果喺聖誕舞會睇中個女仔，就決定接住落黎嗰4個鐘都有如鼻屎一樣黏住她。但即使你倆有幾咁相逢恨晚，話題總有冷卻下來的時間，而這種「尷尬的沉默」足以扼殺任何愛情的幼苗。所以你必須準備退路，在氣氛變得奇怪之前離場。

你可以推說有朋友在等你，又或者想去拎多杯嘢飲，甚至係介紹佢比你朋友認識，反正就是自然地脫離「兩個人的交談」，畢竟你都會想去睇下場中有冇其他漏網之魚嘛！如果可以的話，用一個好笑的笑話作完結是一個不錯的選擇，又或者選擇抄佢牌－放心，如果你哋傾得開心，佢唔會抗拒嘅！記住久唔久在遠處給她一個「有感情的回望」喎！

總結

喺一晚的時間之內識咗個新朋友、有個好的印象、初步了解，仲拎埋人家的聯絡方法，算係大豐收架啦！接住落黎就要進入另一階段！咁就要等「備忘錄2」啦!