話說早排有唔少朋友，因為見到《幪面超人REVICE》反派Aguilera「浅倉唯」太過驚豔，紛紛表示要投敵支持反派。最近另一部特攝作品《超人Trigger》似乎又有相同情況出現！事關為反派「卡爾蜜拉（Carmeara）」配音嘅聲優「上坂堇（上坂 すみれ）」，日前突然親身演出人令觀眾又驚又喜，今次大家係咪又投敵啦？

今年29歲嘅「上坂堇」自細就讀名牌女校，期後更考入上智大學主修俄語，精通日、英、俄三種語言。2011年初出道就為《要聽爸爸的話！》主角「小鳥遊空」配音，後來相繼聲演過《少女與戰車》、《艦隊Collection -艦Colle-》等知名動畫，當然唔少得仲有搞笑動漫《POP TEAM EPIC》啦。

除咗聲優工作之外，唔好睇佢平時收收埋埋大走清純可愛路線，佢曾經就喺28歲生日推出寫真集，罕有咁展示不為人知嘅性感一面，不過話晒寫真唔係佢本業，所以試過一次就冇再影啦。