雖然話近年兩性平權興起，以往「男主外、女主內」嘅形象漸漸退卻，但唔少日本女星結婚後，都依然會選擇淡出、退出演藝界，唔好講話有新作品，連喺公開場合見到佢哋嘅機會都唔多。但今晚要介紹嘅呢位寫真女星「高城れに」，雖然去年就成為人妻，但近來嘅寫真量反而有增無減，莫非人妻嘅吸引力真係咁高？

現年30歲嘅「高城れに」，早於中學二年級時就已經被星探發掘，次年就以組合「桃色幸運草 (後來改名為桃色幸運草Z)」正式出道。組合出道後雖然成員屢經變遷，但佢就一直擔任隊長。而組合嘅發展亦相當順利，於2012年達成參加「紅白歌唱大賽」嘅目標，2014年更搶先AKB48，成為日本第一隊於國立競技場開演唱會嘅女子偶像組合，過往亦曾於歐美、東南亞舉行演唱會，頗有國際影響力。

近年佢亦努力發展個人事業，例如出演電影、電視劇等。去年12月，佢宣佈與日本職棒球隊中日龍嘅捕手「宇佐見真吾」結婚，但做咗人妻後佢都都冇放棄演藝事業，黎緊8月尾仲會推出個人寫真集。而為咗宣傳佢亦頻頻登上雜誌，由7月開始，幾乎期期《週刊Playboy》都見到佢。大家又覺得呢位三字頭人妻吸唔吸引呢？

IG：takagireni_official