近日有機會同一個台灣車模傾計，佢話我知比起其他類型嘅模特兒，賽車女郎嘅體型、外表，甚至擺甫士熟練程度都會有更高要求，換言之做得車模嘅女仔都係業界高手。咁車模轉戰水著，又會唔會係所謂嘅「降維打擊」呢？今晚就同大家介紹下近日轉戰水著寫真嘅日本賽車女郎「宇佐美なお」。

現年26歲嘅「宇佐美なお」表示，由於自己初中時已經長得高（目前身高165cm，日本女仔黎講算高架啦）、身材好，所以自細就有個模特兒夢，不過當時嘅佢覺得冇可能入行，所以就將身高用去打籃球。到佢畢業後就輾轉去咗某間酒吧做調酒師，剛好就遇上一位於日本賽車界工作嘅女客人，客人見到又高又靚，就推薦佢去做賽車女郎。

結果佢亦真係闖出成績。除咗成為賽車界寵兒之外，2022年起更跨界參與寫真工作，之後勁減十磅後於去年8月推出首隻寫真DVD，年尾再於「日本Race Queen大賞 2023」中獲得《週Play》賞。眼見自己於寫真界頗有發展潛力，佢近來更宣佈會從賽車女郎卒業，未來將以寫真女星身份繼續活動。換言之大家黎緊會見到佢更多靚相啦！係咪諗起都開心先？

IG：usmno_18