根據Wikipedia，「釣金龜」即係「女性刻意挑選極有錢的男性為結婚對象」。過往大眾對於「釣金龜」大多採取明面上批評、實際上理解嘅態度，但如果我話外國年輕人近來興起一股名為「Throning」嘅「另類釣金龜」風潮，女方不重視男方嘅經濟實力，只著重對方嘅社交地位，各位又會點睇呢個新現象呢？

圖片：《The Wolf of Wall Street》

正所謂「人望高處，水向低流」，人們會偏好比自己更吸引嘅另一半其實並非新奇發現。早於2018年，美國密西根州大學嘅兩位學者，就曾經發表研究指出使用交友App嘅男女均會追求比自己吸引嘅另一半，而且平均而言佢哋追求對象嘅吸引力會比自己高25%。而所謂「Throning」（沿自王座嘅英文Thone），其實就係特指「約會一個只沾上邊都可以提升你名氣或自我嘅人」，亦即透過約會社會地位比自己高嘅人，從而提升自己嘅地位。

圖片：《The Greast Gatsby》

與傳統「釣金龜」唔同嘅係，「金龜」通常係非常有錢，而佢哋更高嘅社會地位好可能都係沿自於有錢或家族優勢（其實都係錢）；而對「Throning」黎講，有冇錢唔係重點，重點係同佢一齊（或被人知道你同佢一齊）能夠提升自身嘅社會地位及名氣。

好明顯，「Throning」同「釣金龜」一樣都唔係健康嘅感情關係。以此為動機開始嘅感情缺乏正常關係嘅基礎，例如人格上嘅吸引、共同興趣或話題、情感上嘅交流等等。簡單黎講就即係將另一半矮化成首飾、潮物、包包等「裝飾品」。但觀乎外國媒體自2020年就已經寫緊呢個「新詞」，到今時今日都仲有人繼續討論，睇黎「Throning」已經成為現代感情世界嘅重要元素之一。

資料來源：New York Post、The Swaddle、PureNow