如果你走去問啲女星、網紅點解要出寫真，點解要拍性感相，咁你好可能會得到「紀錄自己青春嘅時候」呢個答案。至於個答案可唔可信啦喎…通常就係大家見仁見智。不過如果係今晚要介紹呢位「那蘭のどか」同我講佢出寫真係為咗「紀錄自己青春嘅時候」，我又真係會信。事關佢黎緊會出嗰本寫真，竟然用咗3年先拍完，而且真係紀錄咗過去三年嘅起起伏伏！

現年19歲嘅「那蘭のどか」，最初係於2021年打敗近3000名參加者，成為日本著名女歌手「大森靖子」有份策劃嘅女團「ZOC」新成員而出道，當時仲叫做「鎮目のどか」嘅佢更被「大森靖子」稱為「與別不同的存在」，可見大家都對佢寄予厚望。事實上佢往後幾年嘅演藝事業發展亦相當唔錯，尤其係2023年為《Friday》獻出首次水著寫真後，更令佢人氣蒸蒸日上。

不過去年3月時，佢就突然宣佈會離開ZOC以及當時嘅經理人公司，並於同年9月改名「那蘭のどか」，加入人氣女團「iLiFE!」。黎緊2月6日更會推出首本個人寫真集《忘れたくない》儘情展現164cm嘅高挑纖細身材。

根據官方介紹，《忘れたくない》嘅拍攝期長達三年，橫跨「那蘭のどか」於前團體活動、高中畢業、加入「iLiFE!」前嘅空白期等各個時段，可以話真係紀錄咗「那蘭のどか」嘅「十令歲」嘅最後時光。或者大家睇佢本寫真集時都可以感受到佢嗰種「人家有女初長成」嘅改變啦！

IG：ilife_nodoka