近排天寒地凍，大家應該都需要啲新刺激黎行氣活血，而今晚要介紹嘅呢位寫真新人「宮嶋くるみ」，就應該能夠達到呢個「療效」。但你又唔好以為佢係以火辣身材行先咁表面喎，真正令人感到暖意嘅，其實係佢令你由個心到暖出黎嘅超甜美笑容！

一月初啱啱滿21歲嘅「宮嶋くるみ」，於2023年參加曾發掘多位日本女明星嘅「美少女図鑑AWARD2023」，並獲得「審查員特別賞」而出道；去年佢再接再厲，轉戰《週刊Magazine》舉行嘅年度寫真新人選美比賽「Miss Magazine」，雖然最後冇拎獎，但晉身最後16強亦已經證明咗佢嘅寫真潛力。直到今年一月佢為《FRIDAY》拍攝首次本格寫真後，更係憑住甜美外貌可愛笑容，以及不俗嘅身材獲得大家注意，非常有潛力成位下一位寫真界寵兒，未來亦打算向演員方向繼續發展。

不過，其實「宮嶋くるみ」本身並唔係想做演員，當然亦冇諗過拍寫真。從細就鍾意睇動畫嘅佢，本身其實係想做聲優，所以中學時就已經加入聲優學校，每日練習發聲，舌頭活動，以至錄音技巧、演戲、唱歌等技能。而正正就係當中嘅演戲訓練，啟發咗佢去想做演員嘅心，所以後來先會走上台前，以至依家進軍寫真。人靚聲甜仲目標明確，似乎大家都可以期待下佢未來嘅發展啦！

IG：k.miyajimaa