基因呢樣嘢有時好得意：明明同一對父母所生，但姊妹（或兄弟）之間往往會係一個靚、一個唔靚。所以如果有對一樣咁靚嘅姊妹花，自然就會引起話題——而今晚要介紹嘅呢位「志田こはく」，就係目前日本寫真界最強姊妹花嘅妹妹，而佢家姐就係寫真界巨星「志田音々」。

現年20歲嘅「志田こはく」細個時本來係玩花式溜冰，但到中學二年級時就因為受傷而被逼放棄。呢個時候比佢大6歲嘅姐姐「志田音々」已經老早贏咗「Miss Teen Japan」亞軍出道，並於寫真界、藝能界佔一席之地。

姐姐嘅經歷啟發到妹妹「志田こはく」，於是佢於2020年同樣報名參加「Miss Teen Japan」，雖然只於關東地區大賽就止步，但仍然吸引到經理人公司同佢簽約。2022年以舞台劇演員身份出道，同年再接拍日本「超級戰隊系列」嘅《暴太郎戰隊Don Brothers》火速走紅，成為該系列第一位於2000年後出生嘅女主角，短短兩個星期後再上埋《週刊Playboy》獻出自己嘅處女寫真。

有趣嘅係，志田家兩姊妹出道後嘅經歷可謂完全倒轉。妹妹「志田こはく」係出道先去拍特攝然後再拍寫真；姐姐「志田音々」就係拍咗寫真好多年，到2023年先於《幪面超人GEATS》中飾演櫻井沙羅（幪面超人HAKUBI），唔單止按年份黎計係妹妹嘅「特攝后輩」，甚至姐姐嘅變身畫面都係向妹妹嘅變身畫面致敬。

大家亦可以去睇下我之前為大家介紹姐姐「志田音々」嘅文章。你鍾意姐姐多啲，定妹妹多啲呢？

IG：shida_kohaku