係呀，又黎啦，AKB又有人要退團啦！呢幾年從AKB或其姊妹團卒業嘅人真係多到數唔哂，而且唔知點解個個都喺退團前後拍寫真造勢，而且個個嘅經歷都差唔多，搞到我都就黎諗唔到可以點去介紹。好在今次要退團嘅呢位「村山彩希」，係一位AKB紀錄保持者，我先叫有啲嘢可以寫咋！

今年6月即將滿28歲嘅「村山彩希」係於2011年時參加ABK第13期生徵選而入團，唔好睇「13期生」好似都好新咁呀，其實佢已經係目前團內資歷第二深、年齡第二大嘅成員。而於團內活動超過10年亦令佢成為AKB嘅紀錄保持者。事關佢自2011年12月8日於AKB劇場初次亮相之後，就頻頻參加劇場公演，到2021年時更創下參加1000場公演嘅紀錄。大約10年時間參加1000場，計返就即係平均一個禮拜參加兩次公演，淨係呢份毅力都值得大家佩服啦下嘛？

但或者就係因為創下紀錄、年紀又開始大，所以佢於去年年尾就宣佈會於今年6月15日，即係佢28歲生日時正式退團。而近日佢就登入寫真雜誌《ENTAME》，公開咗新水著寫真。事實上佢2022年亦出過個人寫真集，表現似乎亦唔錯。雖然目前未知佢退團後會向邊個方向發展，但或者大家都可以期待下佢未來嘅新寫真啦。

IG：yuiri_murayama_1st