雖然話睇寫真嘅重點在於女星嘅身體線條，但所謂嘅「線條」從來都不限於「有前有後」嘅葫蘆身型，有人反而係鍾意睇女性嘅肌肉線條。而如果你都係呢類人嘅其中之一的話，咁今晚要介紹嘅呢位「大島璃乃」就應該好啱你口味，事關佢最出名嘅就係嗰排非常明顯嘅腹肌！

現年24歲嘅「大島璃乃」其實係童星出身，早於九歲時就已經參與富士電視台嘅《救命病棟24時》演出，到高中時更因為參加制服模特兒比賽而獲得Sony Music Artist青睞，並正式開始藝能活動。2019年時佢本來獲得日本名校上智大學嘅推薦入學資格，但一心想加入藝能界嘅佢毅然決定放棄入學，走咗去返一年兼職，然後靠賺到嘅錢搬去東京全力發展。結果2022年成功加入東京電視台嘅著名節目《王様のブランチ》，去年仲贏到日本電影視製作人協會主辦嘅Élan d'or賞演員研討會優秀賞。簡單黎講就即係發展得相當好嘅意思啦。

而對於我哋「深夜系列」黎講，佢最重要嘅成就或者就係2021年參加《Miss Magazine》遺美並贏到審查員特別賞，自此之後佢就成為各大雜誌嘅寫真常客。而佢嘅最大賣點，就在於幾乎冇一絲贅肉、肌肉線條非常明顯嘅腰身。而之所以有咁明顯嘅腹肌，除咗因為佢近年努力做Gym，亦因為佢從小就係運動健將，入水能游四種泳式、出水可以跑800米及1500米長跑，中學時甚至可以參加馬拉松嘅縣級比賽。所以依家先有呢副非常健康性感嘅Body畀大家欣賞咋。

IG：oisland_rino25