有時「幸福」呢家嘢，真係靠對比出黎。所以如果你覺得自己嘅人生好悲慘嘅話，睇下今晚呢位日本Cosplayer嘅悲慘故事，或者會令你好過啲；如果你本身就屬於幸福嘅一群，咁睇到個靚女心情都一定更好啦係咪？

現年26歲嘅「ミンミコ」出身於日本大阪。雖然佢本來於Cosplay界就已經頗有名氣，但要數到佢嘅「成名作」，就一定要提到2023年尾Comiccon時佢發佈咗一張Cosplay照，配上「速報！老家火災仍然黎Comiccon嘅勇者」——你唔係以為佢只係為咗流量誇大其詞，據佢後來接受訪問時透露，於Comiccon前一日佢真係接到住喺老家嘅媽媽來電，話佢知因為隔離屋被縱火，結果一排17間屋一次過被燒成白地。當時佢仲諗住返去照顧媽媽，但媽媽同佢講「你返黎都做唔到啲咩㗎啦，坐子彈火車返黎嘅錢畀咗我好過啦！」於是先有「老家火災仍然黎Comiccon」一事發生。

可惜佢哋嘅衰運仲未完。因為火災前幾個月佢哋嘅火險先被取消，所以連住酒店嘅錢都無，只能住社區中心。但又因為社區中心有居住期限，臨近年尾又無地產鋪開工，差啲要瞓街過年。好在最後媽媽搵到朋友借出間吉屋暫住，先算解決燃眉之急。最慘嘅之後仲要自費150萬Yen清理間屋嘅殘骸，令情況雪上加霜。

事實上呢單亦唔係「ミンミコ」人生中第一件慘事。佢話小時候爸爸本來接手爺爺嘅生意，但好快就經營不善欠下上億Yen嘅債務，爸爸亦成為每日喺屋企睇AV嘅廢人，屋企從此過住極度貧窮嘅生活。佢由高中時就已經去打多份兼職養活自己，去到大學以為生活開始平穩，結果又遇上疫情令一切歸零。後來佢去東京闖蕩之時又遇上變態跟蹤狂及性騷擾社長，甚至連喺東京住嘅破舊凶宅公寓都真係有鬼（隔離無人住都不停有人敲牆）。可以話佢到目前為止嘅人生簡直比電影更奇情。

好在佢本人相當正面，仲張《勇者鬥惡龍》中學到「只要足夠努力就能成功」當成人生格言。加上自從Comiccon一事令佢人氣急升，近年仲進軍埋寫真界闖出成績。希望未來嘅佢一切順利啦！

IG：mikomiko967