唔少兩性專家都講過，最受女性歡迎嘅男人特質唔係靚仔、唔係有錢，而係幽默。我唔知自認幽默嘅你受唔受女性歡迎，但我相信大部份男人都認同其實幽默嘅女性都可以好受歡迎，如果幽默得黎仲生得可愛就更加好添！好似今晚要介紹呢位「新居歩美」咁，就係一個又靚又搞笑嘅好例子啦。

現年22歲嘅「新居歩美」出生於日本香川縣。2020年參加「LIVE PLANET總合徵選」入圍，並被安排加入偶像女團「アキシブproject」而搬到東京出道。翌年就已經於《週刊Playboy》獻出寫真處女作，身高僅得148cm嘅佢仲於雜誌舉行嘅年尾頒獎禮贏到「最佳封面獎」，證明佢身材外貌有一定睇頭。

2022年原團體改組後，佢就轉投依家嘅團體「ドラマチックレコード」再次出道，隨即就迎來事業爆發期，出歌出Show就不在話下，寫真亦不停有新作品，甚至主持埋電台節目，仲成為綜藝節目常客。亦因為咁，大家先發現佢原來係個「大喜利」高手！

所謂「大喜利」最初係指日本歌舞伎表演最後一幕嘅術語，後來演變成一種由主持人提出問題或主題，參賽者運用聯想力同反應力回答以製造笑點嘅日本綜藝遊戲（想知更多的話，推薦大家去睇台灣YouTuber「面白大丈夫」）。而本身就熱愛日本喜劇嘅「新居歩美」可以話係箇中高手，唔單止於今年初舉行嘅「偶像天下一大喜利武道會」中帶領團體獲得第一，出席YouTube節目「佐久間宣行のNOBROCK TV」時更被著名喜劇人「佐久間宣行」封為「最強大喜利偶像」。人靚身材好又搞笑，抵佢紅啦！

IG：ayuchi_nii