超搶手日本「富士山」杯

文：MenClub 魏文青　　
POSTED ON 09 Nov 2015

「曾沿著雪路浪遊　為何為好事淚流　誰能憑愛意要富士山私有」好一首《富士山下》，寫出人於愛情之間無奈！之但係，呢句歌詞真係有啲錯，因為你真係有機會擁有一座自己嘅富士山！

文青講緊嘅係近期日本好搶手嘅「富士山玻璃杯」。呢個杯由玻璃器具廠商「田島硝子」生產、「渡部」會社加工，全部生產過程都係人手製作，所以由4月出到依家都係處於供不應求嘅狀態。佢最大嘅賣點就係杯底乃係一個富士山嘅模樣，如果上面裝咗有顏色嘅嘢飲(如酒)，個富士山就會閃耀住同樣嘅顏色…
值得留意嘅係個富士山嘅頂部有做到磨沙效果，睇落就同鋪咗雪一樣，真係賞心悅目。難怪要賣成5400Yen(約350港紙)一個。
如果你真係好鍾意富士山，仲可以買個盛惠10400Yen(約670港紙)嘅精裝版，除咗本身嘅富士山杯同個靚啲木盒，最重要係多咗個上窄下闊嘅啤酒杯，只要倒杯靚嘅生啤入去，就可以重現有雪嘅富士山，型到呢真係。

順帶一提，「田島硝子」仲出過好多唔同關於富士山嘅玻璃製品，而且大部份都可以喺日本上網買到，但呢個「富士山杯」就長期缺貨，預訂都唔知幾時出貨。所以講到尾，原來都係唔可以「憑愛意要富士山私有」嘅，唉。
田島硝子底の富士山が輝く富士山グラスセット Le-Noble