澳牛的黎明—聯發茶餐廳

文：MenClub Mean娜　　圖：MenClub
POSTED ON 29 Sep 2014

曾經有一篇叫《澳牛的黃昏》嘅潮文，喺網路上大熱。作者先以地道香港小市民嘅身份講述從前嘅澳牛有幾咁正，就算服務態度幾差，單憑佢出色嘅炒蛋一樣寸得起，但後來作者再次光顧澳牛，卻發現一切都變了，炒蛋「鞋」了，凍了，連寸到飛起嘅侍應都識講多謝，令佢感慨澳洲牛奶公司的改變，連其特色都逐漸消失，不禁令佢想到澳牛經已踏入「黃昏」。當然，呢篇潮文不單單講澳牛咁簡單，而係透過澳牛慨嘆香港僅有的特式都逐漸褪色。原來，澳牛嘅未來，並唔係黃昏，而係黎明的開始。九龍城侯王道，有一間名叫「聯發」嘅茶餐廳，門面光鮮，賣嘅係大路茶記食物，平凡至極，但原來，平凡嘅表面下，呢間茶餐廳深藏實力，佢係食壇傳奇——澳洲牛奶公司老闆兒子所開的店舖。

澳牛老闆的第二代，因為有興趣做飲食業，得家人同意，自立門戶開茶餐廳。店子樓面由一位女夥計主持，不同於澳牛，侍應們服務有禮，而且保持效率十足。不論上菜、收碟都爽手俐落，而且沒有漏單或錯單的情況，服務令人滿意。雖然潮文認為服務態度良好，有失澳牛傳統，但小編則認為，「禮多人不怪」，始終冇人想畀錢買氣受，只要食物照舊Perfect池，一樣值得支持。

小編先叫了個早餐，離不開牛油多士、炒蛋、火腿通粉及熱奶茶。先嚐一口經典的炒蛋，蛋香滑溜，火候剛剛好，炒蛋無疑是蛋汁豐盈，帶有蛋香，而且鬆軟滑溜，感覺入口即溶，比得上澳牛質素。

而牛油多士的外皮相當酥脆，內裡也甚為軟綿，而且牛油滿滿的充滿整塊麵包，多士的邊焗得非常香脆，更飄出陣陣油香。

火腿通粉雖然較為普通，但小巧的通粉頗有彈性，甚有口感，所以覺得不錯。

熱奶茶的奶味較重，一飲上口就有濃濃奶香。

作為一個飲食記者，小編當然要再多點兩樣店內的招牌菜，才可以向讀者交待。另外小編點咗沙嗲牛肉湯意粉，新鮮牛肉鮮嫩有肉味，沙嗲汁頗惹味，而且湯底濃厚鮮甜，意大利麵質亦很爽口。

公司三文治，麵包軟熟，厚厚的麵包中央夾着更厚的金黃炒蛋，炒蛋嫩滑，咬落充滿層次感，揭開麵包，發現牛油塗滿每個角落，每口都有啖啖牛油香味。

小編從進入店舖，到坐下落單，吃東西，再付款，整個過程，一直聽到夥計不斷「多謝」前「多謝」後，可能有人認為這樣有失澳牛風範，但如果食物可以保持質素，服務態度更加優良，不是一個進步嗎？學劉華話齋，今時今日嘅服務態度，就係要咁樣。地址︰九龍城侯王道2-4號地下1號舖電話︰2718 8832 營業時間︰星期一至日: 07:00-22:30 價錢︰$50以下網址︰https://m.facebook.com/luenfat2014