「759茶餐廳」店面裝修簡約整潔，天花上的燈飾和吊扇頗有特色，算係坐得舒服的茶餐廳。不過「759茶餐廳」開店唔夠一個月，尚有不少街坊慕名而來。當日Mean娜閒日下午去採訪，都見到茶餐廳滿座的場面，所以大家要有入得嚟坐，實要等位的心理準備。

雖然「759阿信屋」賣開零食為主，但原來佢開雲吞麵店同茶餐廳一啲都唔馬虎。就好似之前嘅「759雲吞麵」，主理嘅師傅擁有超過30年經驗，其他師傅平均年資都達20年，唔係隨隨便便搵人淥吓雲吞就算。而今次「759茶餐廳」都請來擁有超過40年經驗嘅師傅主理，班底位位經驗老到，並表示唔會揀平價大陸原料，材料主要來自巴西、紐西蘭等地，例如晚市嘅鐵板西冷牛扒，便用上美國西冷牛肉。

黑椒牛柳絲炒烏冬

餐廳嘅烏冬採用「759烏冬」，產自韓國，特別彈牙滑順。

新加坡炒飯

米飯則用上「759阿信屋泰國頂級香米」，長粒大顆，口感香糯。不過味道方面，炒飯味道偏淡，可能唔是重口味人士杯茶，例如Mean娜。

特色多層三文治(火腿、雞肉、魚柳配雜果沙律)

特色多層三文治滿有心思，唔係非一般三文治來來去去都係火腿芝士蛋等等，一件三文治內有雞肉同魚柳，非常豐富。中間的雜果沙律特意用春卷皮裝起來，美觀又可以增添脆脆口感。

懷舊蝦多士

「759茶餐廳」的餐牌上，有一些普通茶記少見的菜式和小食，例如茶餐時段的「懷舊蝦多士」。店長形容它是「心機菜」，因做法複雜，現在售賣的餐廳已買少見少。蝦多士的蝦膠每天新鮮製作，由師傅自家手打，客人即點即炸，賣完即止。蝦多士偏向薄身，炸得新鮮香脆，而且不覺太膩，蝦肉亦彈牙可口，值得推介。

金絲銀蒜豉汁蒸帆立貝

採用「759阿信屋」的北海噴火灣帆立貝，相對一般帆立貝大粒厚身。這道豉汁蒸帆立貝鮮甜入味，粉絲惹味可口。

紐西蘭羊扒伴香草汁

新推出的「紐西蘭羊扒伴香草汁」鐵板扒餐，用上759阿信屋人氣的「Ovation法式羊架」，羊隻均為1歲以下，在草原上自由放牧的農場中牧養，以天然青草餵飼，確保肉質鮮嫩，脂肪含量適中，羶味遠低於一般羊，配上簡約的香草汁和Rosemary，已能突出羊架本來味道。

奶茶

「759茶餐廳」水吧師傅也擁有約40年經驗。他以3種不同的茶葉，配合其豐富經驗，以特定的水溫和泡茶時間，調出口感順滑的奶茶，雖然奶茶味道芳香，但茶味不會太澀重。

「759阿信屋」的宗旨就是要做好街坊生意，將日本生活區內優質的生活及消費模式帶給香港市民。「759茶餐廳」同樣以此為目標，所以表示會提供區來市民高品質低價錢的茶記食品，打造一間「非一般」的港式茶餐廳。咁我哋又聽吓市民實際上對「759茶餐廳」有咩評價先？

X小姐

「以佢嘅價錢同食物質素嚟講，都幾好啦，唔錯啦，平平哋味道又唔太差，都幾好啦，唔錯啦。」

Y太太

「我之前食過『759雲吞麵』架喇！特登上網搵呢間嘢架！好食呀！好好食呀！哈哈哈哈哈哈哈！」

XYZ先生

(看樣子就知道了吧？不解釋。)

P.S. 「759茶餐廳」可以用八達窿畀錢，So Nice。

P.P.S.喺「759茶餐廳」出示759折扣卡是冇折的，Sor9ry。

地址︰葵涌光輝圍7-9號光輝大廈地下B2號舖
電話︰3669 6945
營業時間︰星期一至日: 07:00-23:00
價錢︰$50以下
網址︰https://m.facebook.com/759StoreHK