魚蛋、燒賣、碗仔翅呢啲地道路邊小食係好多香港人至愛。不過，話明路邊小食，環境質素同食物衛生真係麻麻dee。細個睇電視都有講︰「切勿光顧無牌熟食小販」。

講衛生，大型商場食物衛生程度一定好過小販檔，但好似又一城呢啲大型高級商場，嚟嚟去去都係日本嘢、東南亞嘢或西餐，最親民嘅都係得「麥當當」同「肯德雞」，邊有得話拮魚蛋就有得拮先！NONONO！巴打你錯喇。又一城而家就有個不一樣嘅「路邊攤」(不過「路邊攤」位置較隱蔽，唔容易搵，搵唔到就問商場職員啦)。

九龍塘又一城最近又有新食肆登場，名為「路邊攤」（Lobintan）。負責人話佢哋食物全部香港製造，除咗有港式路邊小食，魚蛋、燒賣、腸粉之外，仲有糖水同新鮮果汁。店鋪外形酷似日本及歐洲常見嘅小食Van，據知設計靈感來自紐約流動街頭的小食車。

Mean娜兜咗幾個圈，見呢個「攤」都幾乾淨，環境唔錯，冷氣亦都足夠，就算腸粉落多咗辣醬都唔會食到流晒汗。外賣盒同路邊攤嘅小食車一樣，都以黑、黃兩色為主，business lunch之後買外賣請同事食，拎到番公司都唔覺老老土土，被逼鬼鬼鼠鼠。

「路邊攤」靈感來自風行美國紐約嘅小食巴士，以紐約經典黃黑色為主調。「路邊攤」小食巴士設計經過心思熟慮，巴士內部係美食準備區， 巴士車身則提供美食資料，更有坐位給顧客輕鬆享用小食，而巴士車頂更係中通，天然光線十足，可令客人身置商場內仍可感受到室外街頭小食嘅感覺。

碗仔翅

「路邊攤」的碗仔翅質地稀稠適中，唔會好似白膠漿杰撻撻，又唔會好似水咁稀巴巴，配材算多，唔錯！

煎雞翼

雞翼煎得香口惹味，內裡肉質稔軟，咬到兩骨中間嘅嫩肉，仲有唔少肉質，真係有少少意料之外。如果顧客打算堂食，仲會用懷舊feel公雞碟仔裝畀你，未食已忍唔住影幾張放fb。

手打特大咖哩魚蛋

魚蛋彈牙爽口，配上自家製的咖哩汁，香濃撲鼻，水準比起長洲某名店過之而無不及。

極品鮑魚雞腿撈麵

採用新鮮黃金網鮑，據講用咗秘方製作，所以捧起碟聞一聞，味道好香濃。配埋香嫩雞腿同爽口撈麵。喺對面城大拉記鋤書鋤到冇晒轉數，建議你過條馬路整番碗清醒吓。不過，每日限售10碗，吃唔吃到幾睇彩數。

路邊攤

地址︰九龍塘達之路80號又一城G層KIOSK S3
電話︰2156 1778
營業時間︰星期一至日: 11:00-20:00
價錢︰$50以下