「Tokyo Banana」係東京自產嘅一種甜品，由GRAPESTONE公司製造，1991年起發售，佢用蒸蛋糕嘅方法製作出好似海綿般嘅蛋糕，內餡則使用香蕉原汁做出嘅鮮奶油，產生自然嘅香蕉風味。

雖然「Tokyo Banana」並唔係啲咩新嘢，但係唔少人去東京都依然會買「Tokyo Banana」返嚟做手信，但你以為「Tokyo Banana」就咁食已經非常好味？錯錯錯！官方就發表咗「令Tokyo Banana更好吃的美味食法」畀大家參考，下次收到「Tokyo Banana」做手信時，唔好咁心急一嘢啪晒佢，試下官方建議嘅食法，可能會令你更加愛「Tokyo Banana」！

「令Tokyo Banana更好吃的美味食法」︰
喺未開封嘅情況下直接連同包裝將「Tokyo Banana」放入雪櫃，裡面嘅香蕉內餡就會變成雪糕一樣嘅口感！

．冷凍30分→口感冰涼

．冷凍1小時→內餡稍微結凍但仲算柔軟

．冷凍1小時30分鐘→內餡會變成好似冰沙一樣嘅口感

．冷凍2小時→稍微有啲硬但冰冰涼涼好好食

．冷凍2小時30分鐘→口感偏硬但都有唔少人鍾意

而官方就認為「1小時30分～2小時」左右係最佳嘅冷凍時間，下次收到「Tokyo Banana」嘅時候一於試試佢！