近呢兩年珍珠奶茶喺日本hit爆，甚至延伸到創作埋一堆古靈精怪嘅珍珠暗黑料理，簡直係挑戰緊人類同珍珠嘅極限！之前MenClub介紹過日本人創作嘅一系列「珍珠奶茶料理」，例如「珍珠奶茶飯」、「珍珠奶茶奄列」等等，家下又多一味新搞作，就係「珍珠奶茶沾麵」！

日本嘅「麵屋武蔵」以沾麵起家，而佢每間店都有特色菜單，今次呢個「珍珠奶茶沾麵」就係位於東京田町嘅「五輪洞」分店所出嘅新菜式，唔少人一見到「珍珠奶茶沾麵」，都大無畏咁衝去試，真係估唔到，認真佩服！

呢個「珍珠奶茶沾麵」係喺奶茶裡面加入鰹魚高湯，聽落好似好怪咁，但食過嘅人都表示其實味道唔差，口味相當清爽，仲有啲似豆漿添。目前呢個「珍珠奶茶沾麵」套餐大約1000日圓，配料有蔬菜、雞肉、珍珠、麵以及一細碗杏仁牛奶可以添加。

聽聞香港嘅「麵屋武蔵」都引入咗呢款「珍珠奶茶沾麵」，如果大家喺日本食唔到，都仲可以喺香港試試。