日本出名壽司相信香港人一定唔會陌生，甚至唔少人都會視日本菜為個人最愛。而數到世界最出名嘅壽司店，由人稱「壽司之神」嘅小野二郎成立嘅壽司店數寄屋橋次郎絕對係最多人想食嘅日本壽司店之一，呢間店由2007年起連續12年獲得米芝蓮三星榮譽，但最新一期卻一口氣喪失全部三粒星，究竟係咩原因呢？

由94歲小野二郎創立嘅數寄屋橋次郎(すきやばし次郎)，係世界高度關注嘅日本壽司店，其中美國前總統奧巴馬於2014年訪日時，首相安倍晉三就喺呢間店設宴招待。另外，不少世界巨星好似曉治積曼、美國天后Katy Perry、足球巨星碧咸等都曾經黎到現場享受其日本美食。

而一向被譽為世界級美食同時非常昂貴嘅數寄屋橋次郎，菜單上只有Omakase Menu，亦即係主廚推介套餐，一個套餐盛惠$2900港元。不過，仍然有非常多人慕名而來，餐廳訂台電話每日響過不停，令餐廳應接不暇。因此，餐廳決定取消訂台服務，而正因為呢個決定，米芝蓮必須取消其三星榮譽。

米芝蓮方面解釋，其公司政策係介紹每一個人都可以去食嘅餐廳，所以數寄屋橋次郎已經唔再符合米芝蓮嘅要求，所以只能夠將佢剔除。

據最新消息指，而家你想成為數寄屋橋次郎嘅座上客，你一係就係熟客、一係就有特別關係（新客人須要有熟客介紹），又或者透過頂級酒店禮賓部訂位。

雖然失去米芝蓮三星，但相信想食數寄屋橋次郎嘅人仍然多不勝數，對餐廳嘅營業額應該唔會有太大影響。