阿唔知邊個話，女人就算食飽飯，都總有第二個胃去裝甜品。與其話甜品係支撐女人身體嘅食糧，不如話係佢哋心靈支柱更貼切，除了可以用甜絲絲嘅味道滋潤佢哋嘅心，更可以用漂亮嘅外觀去呃人哋啲Like！呃Like喎！女人梗在乎！

如今香港韓風當道，韓國甜品佔一重大席位，乜鬼嘢蜂巢雪糕玩到火紅火熱，就算係唔好甜品嘅男士，為了女人，都總要識返兩樣傍身，以備媾女時發揮作用。

難得西環大學站開通咗地鐵，不妨去掟個靚彎，再介紹間隱世甜品店過你女人，包佢讚你有心思。

其實呢間韓式雪糕店「Grandy Mary」真係近到連彎都唔駛掟，大學地鐵站一出就係，顯而易見。

登登登櫈！！！即將為大家開估啲人排隊為咩～就係為呢種現時韓國極為流行的「雪糕馬卡龍」！一次過將女生嘅至愛合二為一，真係Perfect池！

馬卡龍加上滑順嘅雪糕十分對味，雪糕共有5種口味，包括綠茶、士多啤梨、朱古力以及蜜糖。雖然雪糕嘅厚度冇韓國嘅雪糕馬卡龍咁誇張，但Mean娜反而喜歡呢個厚薄程度，因為食嘅時候唔需要擘到個口太大，依然可以懶淑女，保持形象，又唔會食到論論盡盡。

不過雪糕馬卡龍每日只限發售30個，想試嘅話真係要趁早。

蜂蜜分子珍珠雪糕可以話係蜂巢雪糕嘅改良版，不少人都覺得蜂巢雪糕太甜膩，而蜂蜜分子珍珠雪糕則將甜度較低的蜂蜜製成珍珠膠囊，好似三文魚子咁，一咬就爆，流出清新蜜糖味，甜而不漏，仲好有口感。