Apple早前連埋iPhone 12推出MagSafe無線叉電器，15W已經係佢出過最快嘅無線叉電。而喺太平洋嘅另一邊，中國嘅小米近日都推出咗個新嘅無線叉電器，輸出功率高達80W，係Apple MagSafe無線叉電嘅4倍！

圖片：小米

小米上年推出咗一個30W無線叉電，今年較早時間推出咗個50W嘅，依家又出多個80W嘅，即係唔夠一年時間，個輸出功率就多咗一倍有餘。據小米於官方Blog嘅介紹，呢個80W Mi無線叉電用19分鐘就可以將一個4000mAh嘅電池叉到100%，如果叉到50%更只需8分鐘。

但要留意嘅係，個無線叉電輸出到80W，唔代表你部電話收到80W電，都要睇返電話本身嘅規格係支援幾多W。例如iPhone 12就只支援7.5W Qi無線叉電、MageSafe無線叉電就支援15W。

據《The Verge》報導，無線叉電呢個方面，目前似乎只有中國廠商如小米及華為努力發展，而且雙方都集中於功率等數字。例如華為今年初都推出咗40W嘅直立式「無線超級快充」。