作為一個Gentlemen，學識去品味生活係必須嘅，而講到品「味」就當然要由識飲識食開始學習，但有時啲貴價食材如魚子醬、香檳咁，又冇理由自己慢慢試，如果有人能夠教你去品味就事半功倍。為本港多間米芝蓮星級餐廳供應頂級魚子醬嘅Royal Caviar Club就將會舉行「魚子醬鑑賞班」，除咗傳授相關知識之外，仲可以親自品嚐五款高級魚子醬！

鑑賞班將會由來自俄羅斯嘅魚子醬專家Oksana Dragun領導，專為對魚子醬認識唔深甚至零認知嘅入門人士而設，當中會教授魚子醬嘅來源歷史、冷知識、飲食文化、招待及品賞標準皇室禮節，火速充實你對魚子醬嘅認識，亦可以品嚐Royal Cristal魚子醬（Royal Cristal Caviar）、黃寶石Ossetra魚子醬 （Imperial Ossetra Caviar）、黑鑽石西伯利亞魚子醬（Premium Baerii RARE）、Beluga 頂級鱘魚子醬（Royal Beluga Caviar），以及皇家級金水晶魚子醬（Royal Cristal Gold Caviar）五款高級魚子醬，嚐鮮之餘亦可以實習一下學到嘅禮儀，第二有機會食到就唔怕失禮啦。

充實完個腦，仲可以充實埋你個肚。事關鑑賞班後仲有由Guerrilla Lab創辦人Nicholas Chew主理嘅五道菜魚子醬美食配對，以北海道海膽amuse-bouche (法式小點)配Royal Cristal魚子醬、 龍蝦配布冧及法式牛油汁配搭黑鑽石西伯利亞魚子醬、和牛配Beluga頂級鱘魚子醬等菜色進一步擴闊你對魚子醬嘅欣賞。整個鑑賞班於2小時內完成，有得食又有得拎 (知識)，抵啦。

Royal Caviar Club

網頁：https://www.royalcaviarclub.com/

電話：+852 6670 6097

營業時間：星期一至星期日，上午10時至下午8時