我知，即食麵陪住你成長，你煮咗幾廿年，駛鬼教你煮。不過人人煮即食麵嘅方法都唔同，你落滾水先，我落凍水先，甚至有啲煮法聽都未聽過。估唔到原來即食麵都咁多玩法！你都識講煮咗幾廿年麵，試吓新方法駛死咩！

而家Mean娜就集百家之大成，一齊研究點樣令好好味嘅即食麵變得勁好味！

滾水落麵篇

一般煮法︰

就用香港人最愛嘅「出前一丁」為例。

根據「出前一丁」麻油麵背後所教的食用方法︰

1. 將麵放入500毫升的沸水中，煮3分鐘。事先將湯粉倒進碗內。
2. 離火後，先將鍋中熱水倒進碗中溶化湯粉，然後加入麵條，輕輕拌勻。
3. 最後加入麻油，即可享用。

「出前一丁」教路，呢種煮法當然最標準。一開始就用滾水煮麵，過程中唔會因為煲水煲太耐令啲麵都淋埋，失去口感。不過如果用返鍋中煮過麵的熱水溶化湯粉，熱水會帶有麵條的油份，有機會令湯底變得油膩。

所以有網民就提出其他滾水落麵的新煮法︰

1. 水滾後落麵
2. 麵熟了以後夾進碗內
3. 加入新滾水及湯料

據悉呢種煮法就可以保持麵身爽滑，又可以隔掉麵條上的油。

想麵條更彈牙，網民有幾個小貼士︰

1. 煮熟麵條後用冰水過冷河
2. 煮麵過程中不斷用筷子摷鬆麵條，令空氣進入麵條
3. 待麵煮至八成熟，便撈上來稍為冷卻（而原是用冰水過冷河）

凍水落麵篇

黃秋生喺TVB《燭光晚餐》節目中，示範凍水落麵的煮法，令網民嘖嘖稱奇，引起討論。

TVB《燭光晚餐》截圖

TVB《燭光晚餐》截圖

凍水落麵再一齊煮滾，正常推斷麵條都會發大同變淋。但有網民表示，平時好似秋生咁煮麵，啲麵係爽架喎，仲冇滾水落咁易稔。

重點係……

麵條一散就要立刻熄火，不然麵條會發脹。

Youtube都有片教用凍水落麵，想學就要睇睇喇。

不過留意返，無論滾水落麵又好，凍水落麵又好，一定唔可以直接煮調味粉。因為當味精加熱致100℃，或煮超過10分鐘之後便會轉變為「焦麩胺酸」，此物質會致癌，對神經毒害較大，長期食用會造成神經系統慢性中毒，導致癌症。所以即食麵食用說明都有提醒，要等麵條煮熟先加入調味粉撈勻。

即食麵新食法︰

如果你已經厭倦即食湯麵又或者即食撈麵等食法，Mean娜可以醒你多一種新食法，就係「即食麵Pizza」！

材料

1. 即食麵（長方型袋裝）
2. Pizza醬（番茄醬也可）
3. 芝士條（把芝士片撕成條狀也可）
4. 雞肉腸
＊大家可以自行配搭Pizza配料，但快熟的食材較為適合

步驟

1.先將即食麵垂直從中間撥開變成兩大片。如果即食麵不是太厚，可以跳過此步驟。