Don Don Donki在港受歡迎相信係人都知，特別係無得飛日本嘅呢段時間就更加成為港人嘅寄託，只要有時間唔少香港人都會去行一轉Donki就當自己去左日本。而唔知係咪因為睇中左香港人呢個心態，Donki決定喺香港開立全球第一間Donki壽司餐廳「鮮選壽司　海之戀店」。

今次Donki全球第一間壽司餐廳，將由日本壽司職人主理，佢地會從世界各地揀最好最鮮嘅食材，等你可品嚐到正宗日本壽司・迴轉壽司，其實如果你試過Donki啲壽司刺身，相信你都知佢咩料啦。

當然Donki又點會咁平凡呢? 呢間新壽司店將以「日本魚市場 與 海底世界」為主題，每晚6點就會舉行唔同嘅活動，好似鮮魚解體及炙燒表演等，務求令你食住野都可以娛樂。

新店開張，餐廳將設接近100款食品，而為左保持質素，佢地將有一套獨有嘅鮮度系統，壽司由制作完成放置碟上起，於指定時間內如仍於碟上將被系統視為逾過最佳鮮味享用時間，咁就唔會繼續提供比客人食。

而價錢方面，Donki壽司店將設有4款顏色碟，將分別為$12、$17、$27及$37，價錢絕對公道，相信一定引來唔少人朝聖試一試，到時希望你唔洗等太耐啦。

「鮮選壽司　海之戀店」詳情

店舖名稱:鮮選壽司 海之戀店
營業時間: 上午10時至晚上11時
地址: 荃灣海之戀商場2樓2001號舖
開幕日期:2021年10月29日(星期五) 上午11時
店內座位:181座位