自從舖租在近兩三年飈升，好多餐飲業老手或初哥，都接受了一個現實：要繼續「玩」落去，必須接受搬離主流旺區。但係搬離旺區，「搵鬼嚟咩！」，咁又唔係搬到新屋嶺或鹿頸咁遠，旺區邊緣地帶，有冇得諗先？

旺角、太子區「邊皮」，即係旺角警署近運動場道一帶啦，有唔少酒吧插晒旗，再想攝位唔容易。打開Google Map望望，就有人喺太子落少少嘅界限街，開咗間自家手工釀製啤酒（Home Brewing Craft Beer）嘅Fusion菜餐廳。

所謂太子落啲，亦即係深水埗邊皮。界限街，18世紀末，清廷以此線為界，割讓界線以南土地予英國。Fusion菜，講融和，喺正界限街開檔，有少少諷刺同幽默，諗真啲，又幾有噱頭。

Foam Bar and Restaurant的老闆Angus特意將店舖開喺界限街，希望營造一個沒界限的環境，乜都有，乜都試，所以設計上，中式又有，西式又有，都幾有趣。

喺而家乜都加防腐劑的社會，新鮮難求。老闆Angus鍾愛啤酒，覺得啤酒愈新鮮愈好。從加拿大返港發展，Angus有感外國好多餐廳都有自家釀手工啤酒，唯香港要搵同類餐廳，寥寥可數。所以決定大膽一試，自己開一間。

Angus搵朋友設計釀酒設備，存放在店內，自己一手一腳包辦整個釀酒過程。

基本上，自釀啤酒的原理與工業釀啤酒的原理一樣。主要過程包括

1.以大麥或其他穀物，待發芽後產生大量酶

2.酶將穀物中的澱粉分解為麥芽糖

3.麥芽糖在酵母的作用下發酵，產生酒精和二氧化碳氣體

4.形成啤酒。

採訪當日，Angus向Mean娜講解部分釀啤酒過程︰出糖、過濾、熬煮。

見到下面個銀色大器皿？就係Angus嘅釀酒設備。

Angus先將粉碎的大麥芽浸在熱水中，讓大麥芽釋放出麥芽糖，形成麥芽糖汁，這步驟就是出糖。然後機器會將麥芽糖汁與穀物分離，即是過濾。而Angus在下圖中，正用銀色大杓子攪拌麥芽糖汁，目的是攪鬆裡面含有的穀物，加快過濾麥芽糖汁。

當麥芽糖汁煮沸了後，下圖Angus再添加啤酒花來調味道，這過程就是熬煮。

Angus咁仆心仆命堅持自己釀酒，原因眾多。

1.自釀啤酒品種變化較多，可以釀造出大部分口味的啤酒；

2.自釀啤酒保留了啤酒中酵母的活性，令啤酒處於最新鮮狀態；

33.自釀啤酒有更豐富的麥香，且不易因氧化破壞啤酒特有的風味。

介紹2款Foam Bar and Restaurant嘅自釀啤酒︰

琥珀愛爾啤酒（Amber Ale）

Amber Ale 帶有蜂蜜味道和明顯的茶香，在原有的柑橘味中，滲透少許啤酒花的辛香。麥芽味則較低調，酒體偏輕。

美式淺色愛爾（American Pale Ale）

American Pale Ale的香氣帶有西柚果香，有柳橙果皮氣息以及偏重的辛香。

Angus在加拿大學新派廚藝，食物方面的確零舍不同，淨係個薯條，都已經搶晒鏡。

瘋薯條 $38

以美國焗薯、日本蕃薯、及日本紫薯製成，3種口味，再沾黑松露菌醬，一出碟勁香，而且薯條入口香甜，正！

黑松露燒黃鯧 $98

先慢煮，然後再煎黃鯧，最後淋上自家製的黑松露醬，口感Creamy，肉質幼滑，而且店家會先起骨，怕骨的人可以放心食魚。

燒椰子雞扒 $54

用初搾椰油、椰奶、新鮮香草，以真空慢煮數小時，再以烤爐烤香表層。椰子味非常濃郁，而且十分入味，與鮮嫩的雞肉融為一體。

燒咖啡Dry Aged Prime特級美國肉眼扒 $198

自家風乾肉眼扒1-2星期，再用上印度一種咖啡調味方法，然後慢慢煎。味道獨特，而且肉質軟稔，但不太覺有咖啡香味。

蒜蓉白酒煮青口 $78

新西蘭的有機青口以白酒及日本清酒調味。酒味香濃，青口鮮甜中保留到少少海水鮮味，好得！

Foam Bar and Restaurant

地址︰深水埗界限街19G號地舖
電話︰2716 0522 / 6706 2897
營業時間︰

星期一至四: 17:30-23:30 

星期五:17:00-01:00 

星期六: 17:00-01:00 

星期日: 17:30-23:30 

逢星期二休息

消費（每人）︰$101-$200