Mean娜都有食過幾次，作為一個芝士狂魔，最愛當然係佢嘅三重芝士熱狗。一打開就見到成個包都鋪滿芝士，熱溶芝士仲可以拉絲，非常驚喜！3種芝士調成的秘密芝士漿，濃淡適中，仲不失芝士咸香，實在抵佢紅！

另外新鮮炸好嘅笑薯餅都非常不錯，外脆內軟，薯蓉亦磨得細滑，口感軟綿。

不過坊間大把餐廳都係咁，開業初頭人潮不斷，但呢啲Gimmick嘢都係曇花一現，啲人貪得意試完就算，有幾多間真係可以Keep住唔跌Watt，繼續生意興隆呢？

本以為Iconic h都係等閒之輩，搞出個熱溶芝士已叫駛出渾身解數，但Mean娜再次行經店外，發覺竟然又有新嘢，而且仲好有驚喜添！

再望望牆上掛嘅熱狗相，冇變喎，都係舊款式，說好的驚喜呢？？

咪心急住～你望埋另一邊牆？呢度咪有介紹3款新熱狗囉～

新登場的熱狗包括︰「肉麻狗」（Sichuan Spicy Dog）、「雙囍狗」同埋「魚蛋狗」。

先介紹「肉麻狗」（Sichuan Spicy Dog）

「肉麻狗」係由德國腸及四川麻辣肉碎所組成，啱晒食肉獸的你。

再嚟介紹「雙囍狗」

「雙囍狗」放上兩條德國法蘭克福腸，再配熱溶芝士以及烤菠蘿，酸酸甜甜，Juicy又開胃。

最後係「魚蛋狗」

「魚蛋狗」唔係真係放粒魚蛋落去，而係用挪威三文魚肉腸，再加上明太子滑蛋同明太子沙律醬，每咬一啖都滲出濃濃魚香。

講多無謂，畀個實物你睇最實際！

「肉麻狗」嘅肉碎絕不慳皮，多到滿晒出嚟。唔好以為辣肉碎只係得個樣，佢嘅麻辣味確係有料到，比得上真正的川菜。加埋辣肉腸，每一口都是肉，女仔食可能會覺得太重口味，但男士食應該會感到非常滿足。留意返，由於真係超多肉碎，所以進食時不免左跌右跌，建議食之前準備定紙巾，以免食到周圍都係，狼狽不堪。

炸洋蔥圈雖然唔係新嘢，但有幫襯過Iconic h的人都知道，曾經因為人潮太多，準備不及，所以一度停賣炸洋蔥圈。如今大家熱情淡了，所以洋蔥圈重出江湖。事實上Mean娜不太好洋蔥，但Iconic h的洋蔥圈的確容易入口，炸粉唔多，食得到洋蔥的甜味，相信喜歡洋蔥圈的人一定會更為受落。

後記︰作為一間香港小店，Iconic h算是非常有誠意，在食物上願意花心思，盡量提高品質，唔係單靠綽頭上位，而係有心機持續發展，做出更多創意小食。而家過咗大熱時期，冇咁多人排隊，不妨試試店裡新推出的熱狗，值得推介！

Iconic h

地址︰紅磡必嘉街97號黃埔唐樓C座106A舖
電話︰5595 5981
營業時間︰星期一至日: 11:00-22:00
價錢︰$50以下
網址︰https://www.facebook.com/pages/iconic-H/1448786135394992