像真度極高！日本鯉魚壽司

文：MenClub Mean娜　　圖：互聯網
POSTED ON 09 Oct 2015

所謂嘅鯉魚壽司，唔係用鯉魚嘅肉去整壽司，而係整出鯉魚造型嘅壽司。好似呢種整成特殊造型嘅壽司，日本人一般稱為「細工寿司」或者「飾り寿司」。食嘅時候，「細工寿司」都會同其他壽司擺埋一齊，而咩時候會食到「細工寿司」呢？多數都係慶祝嘅時候，就會見到咁精美嘅造型壽司架喇。最近Twitter上就有位網友hayato☆＠マクロファージ（@famitikin115）將鯉魚壽司嘅相放上網，短時間內就喺Twitter上被瘋傳，原因係啲鯉魚壽司實在太逼真喇！一齊睇過！

其實呢種鯉魚壽司係用墨魚整出外型，裡面再用海膽、蛋黃、三文魚、紫菜等等食材整出鯉魚身上嘅花紋。

而呢個喺Twitter上造成話題嘅鯉魚壽司，其實係嚟自大分縣一間叫做「丹匠」嘅壽司店。佢用壽司食材整出鯉魚模樣嘅「錦鯉　姿寿司」，之前都有被畫入漫畫當中。

而呢個專門製作宅配壽司嘅「丹匠」，仲會將超逼真嘅錦鯉壽司放入便當盒入面賣，對大人嚟講可能會係個好好嘅驚喜，不過都因為過於逼真，有時會嚇親小朋友。