素食者慎入日本新興「生肉蛋糕」

文：MenClub Mean娜　　圖：互聯網
POSTED ON 08 Nov 2015

之前見過有單新聞，講有位女士超愛打邊爐，於是佢男友就用一大札「肥牛花」嚟求婚，最終成功抱得美人歸！聽落好似好荒唐，邊有人求婚會用肥牛咁奇怪？但其實送禮這回事，心意比一切更重要，唔一定要跟足傳統，就好似送花唔一定要送玫瑰，可以送肥牛；求戒指唔一定要鑲鑽石，可以鑲牙齒。同樣地，生日蛋糕都唔一定要送海棉蛋糕…… 日本最近就新興一款生日蛋糕，啱晒唔好甜點嘅人食！不過……素食者最好就唔好繼續睇喇……皆因以下要介紹嘅……係食肉獸會為之瘋狂嘅……「生肉蛋糕」！

好多人都覺得，生日一定要食蛋糕。雖然而家蛋糕愈推愈多款式，不過對於唔鍾意食甜嘢嘅人而言，個個蛋糕都一Q樣，生日不如打邊爐BBQ仲開心。打邊爐唔係唔得，但係生日冇蛋糕，始終好似差啲嘢。所以日本而家就興緊「生肉蛋糕」，就係用生肉整成蛋糕形狀，影完相開心完轉頭就淥咗佢嚟食！

就算只係將一片片肉捲成花放喺碟上，對食肉獸嚟講都勁吸引。

不過以顔色嚟講，好似都係紅肉睇落最好味，白色嘅雞肉就差啲喇。

不過要留意，雖然牛肉蛋糕睇落好味好多，不過唔係人人都會食牛，送嘅時候都要注意返對方喜好。