便利店材料做出日式白玉紅豆湯

文：MenClub Mean娜　　圖：互聯網
POSTED ON 21 Dec 2015

一到冬天，日本人都鍾意食白玉紅豆湯嚟暖吓身。所謂白玉，其實就係湯圓，有時候都會用烤麻糬，然後將佢哋放入紅豆湯裡面，就成為咗日本人冬天嘅傳統甜品美食白玉紅豆湯。

雖然煮紅豆湯同煮湯圓都好簡單，但對懶鬼嚟講，開個火都嫌麻煩。於是藝能界影響力十足嘅松子，最近就喺佢個節目「マツコの知らない世界」中，介紹如何簡易整出白玉紅豆湯。
節目中，冰品達人アイスマン福留就推薦用紅豆雪條同雪米糍，就可以整出好好味嘅白玉紅豆湯，真係咁簡單就得？

人アイスマン福留就話，先將紅豆雪條放入微波爐叮2分半鐘，然後就會變成一般嘅紅豆湯。

跟住直接將雪米糍放入去紅豆湯裡面。

雪米糍一放入暖笠笠嘅紅豆湯裡面，入面嘅雪糕就即刻融化，令紅豆湯更加濃郁，同時都保留咗雪米糍外皮嘅麻糬口感。

咁易整又咁好味，一於今晚用佢嚟做飯後甜品啦！