黃子華曾於《玩無可玩》中講過，有睇相佬話佢個鼻生得好，所以告誡佢「唔好亂咁撩鼻，撩壞啲鼻運」。但原來撩鼻唔單止有可能破壞運情，甚至有可能會破壞鼻腔內嘅組織，導致細菌由鼻腔「上腦」，繼而增加患上老人失智嘅風險！以後大家撩鼻時可能要三思而行啦！

圖片：Pexels

話說呢個世界上有隻叫「肺炎披衣菌」（Chlamydia pneumoniae）嘅細菌，唔單止會令人類患上肺炎，而且大部份晚發性失智症 （即65歲以後發作嘅失智症，俗稱老人神智）患者腦內都有呢隻菌。而為咗知道呢隻菌係點樣走到去個腦到、同老年失智症有咩關聯，澳洲Griffin大學就用老鼠做咗一系測試。結果發現，肺炎披衣菌能夠沿住連接鼻腔與大腦嘅嗅覺神經走入腦部，而且當鼻腔內嘅鼻黏膜上皮有破損時，神經感染嘅情況就更加嚴重。一旦出現感染，老鼠腦部就會開始釋出「乙型澱粉樣蛋白」（Amyloid-beta protein）；而老年失智症嘅患者腦內，同樣能發現高濃度嘅「乙型澱粉樣蛋白」。

用返人話講就即係：「肺炎披衣菌」能夠由鼻腔走入腦部，並引發同老年失智症一樣嘅病理反應。而萬一撩鼻破壞咗鼻黏膜上皮時，情況就更加嚴重。

圖片：Pixabay

必須一提嘅係，上面提到嘅過程目前只於老鼠身上發現，目前係未知道人類感染「肺炎披衣菌」時細菌會唔會一樣走到上腦、腦部會唔會釋放「乙型澱粉樣蛋白」、甚至連蛋白嘅累積是否會導致老年失智症都未知。一切還需進一步研究先能作出定案。不過Griffin大學嘅研究團隊仍然建議大眾唔好撩鼻同掹鼻毛：「撩鼻同掹鼻毛可能會破壞鼻腔內部組織，增加細菌進入腦部嘅風險。」

資料來源：ScienceAlert