【時代不同】現今NBA球風真的軟嗎？

文：MenClub Mr.波特　　圖：互聯網
POSTED ON 30 May 2017


唔係話想貴古賤今，但係相信大部份人都認為宜家嘅NBA無以前咁好睇，其中有啲人覺得防守太軟，又有啲人覺得宜家嘅比賽就只係識射三分球。無論點都好，以前同宜家嘅NBA確實係唔同左好多，但呢啲就只能講係每一個時代有唔同嘅玩法。

就係近日，活塞隊名宿「壞孩子一代」嘅代表，人稱「人型武器」嘅Bill Laimbeer接受左媒體訪問，佢講到自己為左冠軍唔會理任何代價，目標就只有一個。另外，呢位「狂人」亦指宜家嘅NBA比賽強度下跌左非常多，這分明就係講宜家嘅球員實在係太軟啦。

身處喺8、90年代嘅Laimbeer，正正處喺防守強度最強嘅年代，亦可以話係裁判吹罰防守犯規最鬆嘅年代，因為只要你睇番以嘅比賽片段，你就會發現當年嘅防守，特別係活塞隊，究竟有幾誇張，每一個防守都好似係為左攞人而唔係攞波，而「籃球之神」Michael Jordan相信就係吃到最多苦頭個一位。


憑住令所有球隊擔心嘅超硬朗防守，Laimbeer嘅活塞隊連續兩年(1989及1990年)獲得NBA總冠軍。不過，正正由於當年佢地嘅防守導致比賽嘅得分驟降，引致後來NBA為左保持更好嘅觀賞性，所以開始有更多嘅政策黎保護進攻球員，咁樣比賽嘅得分就會提升。而就係咁，防守球員越黎越被防制，一啲好輕微嘅碰撞，甚至只是觸摸也會被認為是犯規，試問係咁嘅前提下，現今嘅NBA球員點樣再好似以前咁防守呢？如果真係好似「壞孩子軍團」當年咁防守，相信佢地全隊都會被驅逐離場。

而專注三分球嘅趨勢，其實都唔可以話佢地軟，咁係因為佢地發現投射三分球嘅效率真係無想像中咁低，再加上當你練習一項技術至極點嘅時候，就會出現好似Stephen Curry呢種Bug。三分球比兩分球多一分呢個係事實，除左呢個明顯嘅好處，三分球係可以拉開空間嘅武器，令球員可以更輕易殺入籃底。更加重要嘅係，三分球對於後衛來說是可以減少殺入籃底與大個子球員發生身體碰撞嘅得分方法，這樣將可以更好的保護身體，以免發生碰撞從而引發不必要嘅受傷。

三分球確實係一項現今最重要又最流行嘅武器，甚至亦會出現好似火箭呢類型走火入魔嘅球隊，完全依靠三分球來比賽。不過，如果籃球比賽未來真係只係變成一場三分對決，咁就真係會令比賽嘅觀賞性大減。而唔排除NBA官方未來為左保持觀賞性，佢地大有機會將三分線拉遠，令投射三分球難度增加，從而減少球隊選擇投射三分球。

所以，從外面黎睇宜家嘅NBA比賽強度的確係跌左唔少，但係咁都只係因為NBA官方定落好多新規則，去令比賽觀賞性增加，又保護球員避免因對方嘅防守而受傷，球員因此亦只能根據規則黎打，所以就出現所謂軟嘅比賽。球員們互相之間激烈嘅身體對抗係可以令球迷睇到血脈沸騰，但係如果好似以前咁比人打到爆晒缸(Isiah Thomas被Karl Malone肘擊頭部需縫40針)，咁就真係唔係咁好啦。