【支持本地】媚外心態令港蒙羞

文：李羅渣　　圖：互聯網
POSTED ON 28 May 2017


應屆英超亞軍熱刺呢季成績咁優秀，相信喺世界各地都會有唔少新球迷支持呢支北倫敦球隊。熱刺都好關照香港球迷，踢完煞科戰一星期都無就嚟香港探下球迷兼同傑志進行友賽，而且隊長洛里斯、中場新星迪利阿里、神射手哈利簡尼都有隨隊，實開心死熱刺球迷。尋日友賽傑志就輸俾熱刺1-4，唔少球迷都覺得傑志表現唔失禮，不過本地大報《蘋果日報》記者就唔係咁睇，仲開條題「二萬觀眾見證熱刺大炒傑志」，係人都知傑志同熱刺實力有好大差距，覺得熱刺會輸先係問題，但作為本地數一數二嘅傳媒，起條咁嘅題講自己地方嘅球會先係最失禮。

傑志雖然貴為應屆港超聯冠軍，不過同熱刺比，客觀嚟講真係爭好多班下，如果呢場有得賭，除咗花生友十元八塊咁買之外，應該唔會有人傻到認為傑志會贏到熱刺，但求傑志可以打返應有表現已經收貨，而且熱刺係英超得球最多同失球最少嘅球隊，傑志依然無畏無懼，無以901應戰，淨係呢種精神都值得支持。雖然熱刺領隊普捷天奴都識做，無評論傑志表現係點，但輸三球兼有波入，真係談唔上係咩大炒，而且條題講到傑志係活靶咁俾熱刺凌虐，都係非常唔中肯。

唔講體育精神，講最客觀嘅往積，喺英超有唔少球隊俾熱刺贏多過4球，好似李斯特城就輸過俾熱刺1-6，候城煞科戰輸7-1，史雲斯作客輸過0-5，可以話熱刺呢場，其實已經好過部份英超球隊。你可能會話，熱刺出副選啫，都唔係架，有唔少喺呢場上陣嘅熱刺球員，喺英超本身都有一定上陣機會，好似艾達韋列特、艾歷迪亞、雲耶馬、孫興慜呢場波都有一定上陣時間。球迷有球星睇，自己地方球隊表現又唔失禮，點解下下要將比數放咁大？

小弟四年前有幸入到大球場睇傑志對曼聯，近距離見到雲佩斯、艾夫拿同李奧費迪南梗係開心，場波曼聯最後贏5-2，不過小弟最深刻並唔係曼聯球星嘅入波，而係傑志中場林嘉緯喺卡域克面前射球世界波笠死門將賓阿莫斯，賽後有曼迷講笑叫莫耶斯sign him（林嘉緯），係有部份無質素球迷因爲傑志無踢波出界等雲佩斯入場而鼓燥。但當傑志進攻時，曼聯球迷一樣會為傑志打氣，傑志入波都會歡呼，原因好簡單，呢90分鐘傑志就代表香港，曼聯多球迷係事實，但都唔會想曼聯嘅職球員返到英國會話香港球迷只係會對自己地方柴台。傳媒報導係社會價值觀組成嘅重要部份，《蘋果日報》當然無義務推動香港足球發展，但帶頭嘲弄香港球會，只會喺國際社會失禮香港，希望《蘋果》正視下旗下記者水平，唔好再寫啲刁難香港嘅體育報導。


李羅渣 (facebook page: https://www.facebook.com/leerogerfcpage/) 八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員由懶到出汁變成泰拳愛好者除咗足球最鍾意就係睇戲、睇書、飲兩杯唔求發大達，最想成為有些少生活品味嘅偽文青。