今年NBA總決賽好快就會進行第一場，而兩支球隊相信球迷們都再熟悉不過，因為佢地已經連續三年喺總決賽呢個舞台上進行對決，而佢地目前一人贏一次，所以呢次將可以再一次分出勝負，決定邊一支先係當世最強球隊。

1、Kevin Durant加入勇士

相信今年對於勇士最大嘅唔同，就係喺原有已經足夠強嘅陣容上加入左另一位超級巨星Kevin Durant，呢位NBA現役最強得分手之一，去年夏天放棄續約母會雷霆，犧牲唔少金錢為嘅就係想再次體驗總決賽，以及一嘗總冠軍滋味。

2、Kevin Love處於騎士時期最佳狀態

今季係Love加入騎士嘅第三季，前兩季一直被外界批評無法融入球隊嘅佢，甚至被傳會被交易掉，但今季呢個問題終於解決，Love真真正正打出巨頭級嘅表現。單睇今年季後賽，Love場均上陣32.1分鐘，可以取得17.2分10.4籃板1.9助攻0.8封阻0.8抄截，投射命中率為45.7％(上季38.5%)，三分球命中率為47.5%(上季41.4%），除了助攻數外其餘全部數據都係季後賽三年以內最高的。

3、Draymond Green更成熟更冷靜

Green自從去年喺季後賽出現唔少為人垢病嘅犯規後，所有人都認為佢就係一位非常髒嘅球員，而呢個喺上年黎講的確係事實，因為佢喺上年嘅西岸決賽時已經累積左5次技術犯規，同時又曾經出現二級惡意犯規，再加上喺總決賽亦出現一級惡意犯規，所以Green都嘗試過被停賽。

4、騎士失去專責防守Curry的Matthew Dellavedova

仲記唔記得上年騎士專責防守Stephen Curry嘅球員係邊個？唔係正選嘅Irving，而係後備嘅澳洲「茅王」Dellavedova。雖然唔少人都認為Della打波好茅，但係其實Mr.波特我就覺得佢自知天賦有限，進攻又唔可以好似Curry及Irving一樣，所以喺場上佢只可以傾盡全力去防守，要守得住Curry呢隻怪物，Della可以做嘅只有奮不顧身全憑努力貼上去，就係佢令到Curry上年吃到唔少苦頭。