【NBA2K18】76人「大帝」Joel Embiid個人數值應值多少？

文：MenClub Mr.波特　　圖：互聯網
POSTED ON 27 Jul 2017


76人「大帝」Joel Embiid上季雖然因為岩岩傷癒而被球隊限制上陣時間，但係佢嘅實力相信大家都已經睇到，無論係進攻定係防守都絕對係精英級別，正因為咁76人先甘願等佢兩年。而即將喺9月推出嘅著名電玩遊戲NBA2K18，當然就會有Embiid在其中，而你又估佢嘅個人數值應該會去到幾多呢？

據報導指，現年23歲嘅Embiid近日去左NBA2K嘅總部探班，隨便窺探下自己嘅個人數值。對自己能力充滿自信嘅Embiid，認為自己喺遊戲入面嘅數值應該達到95，要知道數值達到95絕對係超級巨星嘅高度，而只係上陣31場NBA賽事嘅Embiid有無可能去到咁高呢？

NBA2K工作人員透露，最新一集2K18 Embiid嘅數值為86，數值屬於中上，接近全明星級別的。照理作為一名年輕球員能夠擁有86數值應該開心，但Embiid明顯非常失望以及有點不滿。不過，Embiid其實亦知道這個設定係絕對合理嘅，而佢亦揚言明年嘅2K19佢嘅數值一定會升至95！其實相比2K17時Embiid嘅數值只有77，但打左31場後佢嘅數值已經升左9點，呢個升幅絕對係驚人的。

以目前嘅情況，相信Embiid要喺明年拎到95數值應該無咩可能，但係佢絕對有呢個潛力成為一位達到95數值嘅超級球星，因為佢係一名全能中鋒，擁有低位進攻能力嘅同時可以射3分，擁有一定速度嘅佢又可以自己控球突破，再加上企喺籃底嘅佢擁有極強嘅護框能力，對對方進攻時擁有極強嘅震攝力。之但係擁有呢啲能力都唔係最重要，Embiid首要嘅係要確保自己唔好再咁輕易受傷，如果唔係佢可能只會係另一個Greg Oden架咋....希望真係唔好浪費左佢嘅天賦啦。