【再見】莫拉達提前告別，轉投車路士已定

文：MenClub Mr.波特　　圖：互聯網
POSTED ON 20 Jul 2017


雖然官方仲未發佈相關消息，但係皇馬前鋒莫拉達同英超球隊車路士達成協議後，再加上佢自己同皇馬嘅提前告別，都宣告莫拉達離隊已成定局。

最新嘅消息指，車路士已經同皇馬達成莫拉達轉會嘅協議，目前只係剩底莫拉達本人飛抵倫敦接受體測，咁樣呢宗轉會就可以真正咁達成。以下係莫拉達同皇馬隊友告別嘅情況：

今次莫拉達嘅轉會車路士動用左8000萬歐元，呢個價錢亦都符合皇馬一直表達想從莫拉達身上拎到嘅回報，所以呢次轉會先可以完成。而成功賣走莫拉達，皇馬將多左一大筆錢，咁樣將有利佢地去收購摩納哥前鋒麥巴比，因為呢位18歲年輕妖星身價超過1億歐元。

對於能夠將莫拉達賣到成8000萬歐元，皇馬當然高興，但係我諗皇馬領隊施丹就應該唔係咁想見到，因為佢一直非常鍾意呢位西班牙前鋒，而佢上季雖然大部份時間都只係打後備，但就攻入左20球，效率非常驚人。皇馬上季能夠成為雙冠王，兼且打破改制後嘅歐聯無法衛冕嘅魔咒，其中一個原因就係擁有莫拉達呢位咁出色嘅後備殺手。而喺莫拉達離隊前，施丹一直勸莫拉達留隊，甚至隊用全隊嘅人情牌去留人，只可惜最終都係功虧一貴。

而成功獲得莫拉達嘅車路士，相信領隊干地一定非常高興，因為佢一直都好欣賞莫拉達。之前盛傳車路士只想引入盧卡古，後者唔係干地所希望得到嘅球員，而最終陰差陽錯之下，盧卡古加盟左曼聯，而干地亦終於得到自己想要嘅莫拉達。得到莫拉達之後，干地嘅前鋒線亦得到一啲舒緩，但係基本上能夠派得上用場嘅就真係只有莫拉達一人，所以干地必需至少再購入一名前鋒先可以應付得到黎緊嘅多條戰線。

另外，車路士得到莫拉達亦代表干地唔使再睇迪亞高哥斯達呢位麻煩友嘅面色，後者離隊基本上已成事實，只係睇下最終佢係咪真係加盟馬體會前被外借其他球隊。
莫拉達皇馬比賽精華：