【新世界冠軍】日本搬運工木村翔爆冷KO中國拳王鄒市明！

文：MenClub Mr.波特　　圖：互聯網
POSTED ON 31 Jul 2017


近日拳擊界爆出一場大冷門，一位正職只係搬運工嘅日本拳手木村翔竟然成功技術性KO中國拳王鄒市明，後者被呢位日本拳手奪去WBO蠅量級世界拳王嘅稱號。

呢場比賽開賽前基本上都一面倒認為鄒市明絕對穩勝，日本個位挑戰者木村翔無論人氣、技術、榮譽都難以同鄒市明相提並論，唯獨一樣佢可能較為佔優嘅，就係木村翔只有28歲，較36歲嘅鄒市明年輕8歲之多，體能上理應更好。

而進入呢場比賽嘅頭幾個回合，可以睇得出作為中國拳王嘅鄒市明技術層面都要較木村翔優勝，特別係佢嘅閃避做得相當出色，而佢嘅打法亦以防守反擊為主。相反，無咩壓力嘅木村翔就全力進攻，不斷對對手進迫，即使鄒市明閃避有幾出色亦曾經食左佢幾拳。但係當然鄒市明都係較為佔優個位，佢亦都成功出拳打拳左對方嘅右眼角，所以後尾嘅回合亦都可以見到木村翔不斷血流披面。

不過前面講到可能成為木村翔突破擊敗對手嘅關鍵 - 體能，喺第9回合開始出現。鄒市明雖然閃避嘅動作仍然出色，但係見到佢曾經突然跌到在地，雙腳可能開始有啲腳軟。而黎到第11回合，鄒市明嘅動作明顯慢左好多，出拳嘅力度亦大幅下滑，相反木村翔乘住呢個機會，不斷亂拳作出攻擊，數拳直擊鄒市明頭部，最終鄒市明捱唔住被打到跌落地。雖然之後佢成功企番起身，但經裁判確認後認為佢已經唔適合繼績比賽，所以判定木村翔成功TKO鄒市明。

爆冷擊敗鄒市明後，木村翔成為新一任嘅WBO蠅量級世界冠軍，相信呢個結果應該無咩人估得到，因為佢唔係全職拳手，訓練只可以喺每日放工之後進行，因此相對鄒市明訓練量一定少好多。

而36歲嘅鄒市明係中國拳擊界嘅明星拳手，開頭佢一直都只係業餘性質咁打拳，直至2013年先直正轉為職業拳手。不過當年只係業餘嘅鄒市明，已經得到國家級訓練佢打奧運級別嘅比賽，仲贏過亞運（2006年、2010年）、世界拳擊錦標賽（2005年、2007、2011年）同埋奧運（2008年、2012年）嘅冠軍，係中國真真正正嘅拳王。

對於其實今次輸贏鄒市明其實都唔係最關心，而佢今次參戰全因為想為中國拳擊爭一口氣，希望多啲中國人去關注呢項運動，喺台上佢亦講到好激動，甚至難忍男兒淚，令人睇見都覺得心酸。而今次落敗，鄒市明亦暗示自己可能會就此退役，因為佢已經打左22年拳，覺得係時候要有人上黎接班啦。