【干地頭痕？】衛冕冠軍車路士開季只有15位一隊成員可用？

文：MenClub Mr.波特　　圖：互聯網
POSTED ON 09 Aug 2017


車路士上季喺領隊干地嘅帶領下成功奪得英超冠軍，球隊無論攻守都冠絕英格蘭。不過只係短短一個夏天，本來一支奪得聯賽冠軍嘅球隊喺新球季即將展開前竟然面臨重大危機，就係佢地可以用嘅一隊球員只有15人，係連最基本嘅18人大名單都湊唔齊，如果開咧前未有新收購嘅話，干地屆時需要放上一啲青年軍球員先夠人用。

只能講一句時也命也，目前車路士陣中有幾位重要球員都因傷休戰，其中包括主力夏薩特、新援巴卡約高，而迪亞高哥斯達雖然身體無事，但係佢已經唔喺干地新球季嘅計劃入面，佢離隊只係時間問題。另外，再加上今夏離隊嘅馬迪，同埋一班被外借或免費轉會走嘅球員，車路士如今實際可以用嘅球員只有15人，名單如下：

門將：高圖爾斯、卡巴尼路後衛：卡希爾、艾斯派古達、雷斯、馬高斯阿朗素、基斯甸臣、魯迪格中場：法比加斯、簡迪、域陀摩西斯、韋利安前鋒：巴舒亞伊、柏度、莫拉達

唔係話車路士嘅球員少到砌唔到一套可用嘅陣容，佢地仍然可以派出好似以下咁樣嘅陣容：
門將：高圖爾斯後衛：艾斯派古達、卡希爾、雷斯、馬高斯阿朗素中場：域陀摩西斯、法比加斯、簡迪、韋利安前鋒：巴舒亞伊、莫拉達

但係要用呢套陣容去征戰四條戰線(英超、足總盃、聯賽盃、歐聯)基本上係無可能，一來球員們嘅體能難以應付，二來干地可以用到嘅戰術將會變得受盡限制，面對唔同對手嘅時候將難以招架。

以目前咁嘅情況，干地只能寄望夏薩特同巴卡約高可以盡快康復歸隊，咁樣球隊嘅用人情況將可以即時獲得舒援，特別兩位球員一位係球隊核心，另一位係球隊重金收購嘅新援，佢地嘅回歸將可以加強球隊基本實力同埋陣容深度。除左寄望受傷球員歸來，干地目前只可以希望球隊能夠盡快進行收購，其中目前車路士嘅收購目標有修咸頓中堅雲迪積克、巴黎聖日耳門右閘奧里亞、李斯特城防守中場真禾特、愛華頓中場巴克利、阿仙奴中場張伯倫等等。