【講真話？】迪維斯：「中國足球50年後都不會取得成功！」

文：MenClub 波特先生　　圖：互聯網
POSTED ON 22 Sep 2017

迪維斯呢位球員相信唔少球迷都一定記得，雖然佢2015年夏天已經離開左歐洲球壇，但係由於佢曾長時間效力英超，所以球迷都對佢相當認識。而呢位球員喺2016年年底轉戰中超加入上海申花，但係表現卻無好似其他外援咁非常出色。

現年33歲嘅迪維斯當時轉戰申花，轉會費達到1100萬歐元，而佢拎緊嘅週薪達到61.5萬鎊，甚至比C朗拿度同美斯嘅人工更加高，係世界最高薪嘅球員之一。雖然拎住咁高人工，但係佢目前為止為申花上陣15場比賽，只係攻入過2球，明顯表現同人工唔太成正比。

而近日，呢位「野獸」接受訪問時更加講出一個可能令中國人難以接受嘅事實，佢話：「中國人嘅技術難以同南美或歐洲球員相比，因為後兩者嘅球員從小已經接受訓練，而呢度嘅人們對足球嘅理解卻唔同，所以我認為佢地無法具備一流嘅競爭力，就算50年後佢地亦唔會取得成功。」

對於迪維斯嘅說法，有唔少網民都認為以佢嘅身份講出黎有啲唔適當，因為佢講緊嘅係一個出緊糧比自己嘅聯賽，咁樣對於聯賽嘅聲譽難免會受損。更何況迪維斯近期嘅表現亦未見特別出色，所以理論上佢應該無權去話人地。

不過，中國足球確實係令唔少人都非常失望，雖然中超嘅發展非常迅速，但係中國球員卻無太大嘅受惠，睇番中國國家隊雖然今年成功突破打入世界盃亞洲區外圍賽最後12強，但係卻以小組第5名再一次出局，無緣世界盃決賽週，咁都足以說明中國足球即使單計亞洲都仲係算非常落後。以目前嘅情況睇，可能真係會好似迪維斯咁講，喺未來50年中國足球都唔會取得咩巨大嘅成功。