【爆晒缸】St-Pierre打爆Bisping，奪得UFC中量級金腰帶！

文：MenClub 波特先生　　圖：互聯網
POSTED ON 06 Nov 2017

相信自從Mayweather同McGregor嘅「世紀之戰」後，再加上香港出左一名已經22連勝嘅拳手曹星如Rex，多左唔少朋友會留意有關拳擊或MMA嘅消息，因為當你接觸呢類型搏擊運動後，你就會發現拳拳到肉嘅佢地過程係有幾刺激同緊張。

而就喺岩岩嘅週末，美國紐約著名嘅麥迪遜廣場花園入面就進行左一場UFC賽事，其中焦點落喺已經4年無比賽嘅UFC次中量級世界冠軍Georges St-Pierre身上，呢位今年36歲嘅選手一復出就揀左比自己平時打開高一級中量級嘅世界冠軍38歲嘅Michael Bisping進行挑戰。

今次兩位世界冠軍嘅對決可以話相當緊湊，其中St-Pierre多次攻擊Bisping嘅下盤令佢背向地下，而Bisping嘅直拳則多次擊中St-Pierre嘅頭部，甚至一度將其頭部打至鮮血直流。而就喺關鍵嘅第三回合，St-Pierre獲得機會重拳直擊Bisping嘅頭部令其倒地，然後乘勝追擊利用鎖技緊扣對方嘅喉嚨位置，最終裁判終止比賽，判St-Pierre以Technical Submission擊倒對手。

擊倒Bisping後，St-Pierre同時搶下UFC次中量級及中量級嘅金腰帶，成為雙料世界冠軍。對於能夠成為雙料世界冠軍，St-Pierre表示自己夢想成真。

睇番雙方數據，Bisping一共有58次直擊對手，而St-Pierre則多達74次，因此賽後Bisping亦無搵落敗嘅藉口，並直言St-Pierre係今晚表最更好嘅一方。