【杜奧巴很想去補捉他】魔獸決定2018年退役！

文：MenClub 波特先生　　圖：互聯網
POSTED ON 16 Nov 2017

「杜奧巴～很想去補捉他～」呢句歌詞好快就會成為絕唱，因為歌詞嘅主角「魔獸」杜奧巴已經決定2018年將會正式退役，結束球員生涯。

作為美職聯二級聯賽球會兼老闆嘅杜奧巴，近日接受訪問時宣佈，自己將會喺明年正式退役，結束自己20年嘅球員生涯。2016年，杜奧巴離開蒙特利爾衝擊後，現年39歲嘅杜奧巴就加盟左宜家呢支鳳凰城展翅，岩岩一季佢就為球隊上陣左13場攻入9球，入球能力依然存在！

杜奧巴接受訪問時表示：「我認為明年將會喺我球員生涯嘅最後一季，這是我必須停下嘅時刻。我需要時間去完成我嘅其他計劃。踢波雖然很高興，但我已經39歲了，我已經承受不了。」

美職聯二級聯賽嘅比賽時間係由每年嘅3月至9月進行的，因此如果按照杜奧巴嘅說法，佢將會喺明年9月正式宣佈掛靴。退役後預計杜奧巴將會專心打理佢嘅球隊，去令更多人認識美國足球。

1998年杜奧巴由法國球隊勒芒開始職業生涯，其後喺法甲混跡數年後，當時嘅車路士新任領隊摩連奴就相中喺馬賽效力嘅魔獸，最終以2400萬鎊將佢帶到史丹福橋。效力車路士期間喺杜奧巴生涯巔峰，佢慢慢成長為世界最頂尖嘅鋒霸，並多次助球隊奪得錦標，其中包括4次英超冠軍、4次足總盃冠軍、3次聯賽盃冠軍、1次歐聯冠軍及2次社區盾。