東岸決賽第七戰，LeBron James全場上陣48分鐘，一秒無抖之下個人獨取35分15籃板9助攻2封阻，最終帶領球隊成功擊敗塞爾特人，連續第四年殺入總決賽。賽後唔少人都盛讚LeBron以一人之力帶領球隊殺入總決賽，對佢非常敬佩。不過，實際上除左LeBron表現依舊出色外，其他綠葉都唔可以忽視，其中包括搶七大戰中取下19分嘅Jeff Green。

現年31歲嘅Green，今年季後賽雖然場均只係貢獻8.3分2.7籃板，但係喺東岸決賽搶七大戰中卻攻入19分，係其今季季後賽嘅新高，因此令佢成為騎士再一次晉身總決賽嘅功臣之一。

生涯曾效力多支球隊嘅Green，你可能會以為佢只係一名普通嘅綠葉球員，但係事實上佢曾經經歷嘅事遠比你想像嘅深遠得多，而佢能夠繼續喺NBA征戰已經近乎一個奇蹟。

2007年以首輪第5順位加入NBA嘅Green，本來係被塞爾特人選中的，但隨即被球隊交易至雷霆以換來Ray Allen。加入雷霆後，Green雖然成功入選年度最佳新秀一陣，但卻以奪得年度最佳新秀嘅同屆新秀Kevin Durant助手身份征戰。

2010-11球季期間，場均交出15.2分嘅Green被交易至當日選中佢嘅塞軍，當時塞軍有意培育Green取代即將退役嘅Paul Pierce。不過喺2011年12月，Green卻突然被確診患有主動脈瘤，醫生禁止佢參與任何劇烈運動，當然其中梗係包括籃球，情況同前熱火球星Chris Bosh差不多，總之就係再打波就會危及生命，所以佢被迫停晒所有有球活動。

雖然係咁，Green並無放棄打籃球呢個事業，佢願意接受手術希望根治呢個病，但呢次手術嘅風險可以話極大，因為醫生需要停左佢嘅心跳為佢開個心，而呢個停心跳嘅動作並唔係好似你睇電影咁停幾分鐘，而係停足足75分鐘！最終手術奇蹟成功，Green慢慢地康復過黎。

手術後，醫生曾表示Green嘅心臟附近情況有撕裂嘅跡象，不過多年過去Green成功重返NBA，甚至現在已經係打進總決賽嘅球員！而起初佢亦痛忙自己有呢個病，但如今佢已經完全接受，並透過自己經歷呢個病而更加珍惜生命。

而家嘅Green並唔會放棄任何機會，因為佢唔知自己幾時又會倒下，佢將會把握呢個難得嘅機會去挑戰勇士呢支衛冕冠軍，雖然外界一致睇好擁有海嘯三兄弟嘅勇士，但係騎士擁有「大帝」LeBron James呢位最強球員，唔知Green可唔可以成為佢最佳嘅助手呢？