黎到俄羅斯世界盃最後公佈名單嘅日子，多支國家隊亦正式向球迷宣佈征戰嘅最後23人名單，其中包括上屆冠軍得主、今屆嘅大熱門之一嘅 - 德國。

以下為德國隊23人名單如下：
門將：紐亞(拜仁)、達史特根(巴塞)、查普(巴黎聖日耳門)

後衛：保定(拜仁)、曉姆斯(拜仁)、蘇尼(拜仁)、甘美治(拜仁)、真特(慕遜加柏)、赫達(科隆)、魯迪格(車路士)、赫特(紐倫堡)

中前場：梅拿(拜仁)、魯迪(拜仁)、白蘭特(科華古遜)、達斯拿(巴黎聖日耳門)、哥列斯卡(史浩克04)、根度簡(曼城)、基迪拉(祖雲達斯)、卻奧斯(皇馬)、奧斯爾(阿仙奴)、列奧斯(多蒙特)、

前鋒：高美斯(史特加)、華拿(萊比錫)

上屆世界盃德國隊陣容可以話非常鼎盛，無論老中青嘅球員都有配備，所以球隊兼具活力及經驗，最終淘汰賽7:1大勝巴西、決賽又成功擊敗阿根廷而封王。而黎到今屆，德國隊仍然係奪冠大熱門，雖然球隊失去左老臣子高路斯、拿姆及舒韋思史迪加，但係上屆一班年輕球員已經更趨成熟，並且已經係成為唔少球隊嘅核心球員，好似卻奧斯、達斯拿、奧斯爾、列奧斯等等。

陣容上，球隊中後場賽力可以話非常強大，其中門將有紐亞及達史特根坐陣，而後防則有保定及曉姆斯穩守，另外甘美治喺歐聯嘅表現亦有目共睹。

中場則更加係德國隊最強大嘅地方，卻奧斯係皇馬嘅命脈，奧斯爾亦都係阿仙奴嘅進攻泉源之一，而達斯拿、列奧斯亦都極具威脅，仲有梅拿就更加係把握力十足嘅後上射手。而再睇佢地嘅後備當中，根度簡、基迪拉、魯迪等都係為人所熟悉嘅球員，實力亦都相當不俗。

前鋒線上，雖然德國隊有高美斯及華拿兩位射手，但係前者今季狀態未如理想，後者今季全季係就係攻入21球，不過只有22歲嘅佢明顯經驗大賽方面經驗太過稚嫩，相比上屆嘅世界盃入球最多嘅高路斯可以話差天共地。因此，德國隊前線上係最令人擔心嘅地方，隨時因為攻力不足而導致落敗。

作為世界熱門之一，德國隊近期嘅表現卻令人失望，因為佢地最近已經5場不勝，其中更分別不敵巴西及奧地利，而打成平手嘅則係同西班牙、英格蘭及法國。面對巴西隊，德國隊落敗都仲叫情有可原，但係不敵奧地利則係令人難以接近的，因為佢地係32年來首次不敵對手。作為目前世界第一，又係黎緊世盃嘅大熱門，咁嘅狀態要想衛冕睇黎真係落難過登天。

不過領隊路維就仲有少許時間進行調整的，其中德國黎緊將會對上沙特阿拉伯，呢場係世盃前最後一場友誼賽，屆時球隊必須盡可能提升狀態，如果呢場都無起息的話，今屆德國隊隨時好似上屆西班牙咁，作為衛冕冠軍喺小組賽就出局。

德國隊小組賽入面分別有瑞典、墨西哥及南韓，相信南韓及瑞典係小組當中實力最弱的，但係瑞典大打團隊足球，所以可能會有驚喜。而墨西哥則靠「小豆」數糊，實力上相信係最會比到德國威脅嘅球隊。不過照牌面睇，德國要想殺入16強難度唔算大，但進入淘汰賽情況則較為令人擔心。