今屆世界盃，阿根廷頭兩場比賽可以話係踢出醜陋嘅足球，核心美斯被批評喺球場上散步，又經常頭耷耷，毫無領袖風範，所以導致球隊面臨小組賽出局邊緣。

而就喺小組賽最後一場面對尼日利亞需要背水一戰嘅賽事入面，美斯終於迎來覺醒，佢唔單止一控一射為阿根廷率先破網，更重要嘅係佢終於擔番起領袖應該做嘅事，就係調整好自己嘅精神面貌，並且去鼓勵一眾隊友。

許勝不許和及敗嘅阿根廷，上半場憑住美斯嘅入球1:0領先尼日利亞，但係1球並唔足以令球隊放心，因為只要對方入1球迫和嘅話，阿根廷就會係咁先，所以當時一眾球員其實正面臨住極大嘅壓力。

就喺半場休息完結後，阿根廷球員步入球場前，隊長美斯就拉住全隊所有人講話，可以想像得到美斯係鼓勵一眾隊友，而呢個情景喺過去兩場比賽都完全無見過的。最終，雖然尼日利亞喺51分鐘追番一球，但係喺比賽86分鐘，後衛盧祖後上射門成功助球隊重新領先，並一直將領先帶到比賽完結，結果阿根廷艱難地打入16強。

好明顯美斯半場時嘅講話係起到重要性嘅作用，而賽後盧祖亦透露美斯當時究竟講左啲咩：

「在半場嘅時候，美斯同我地所有人講，只要有機會我地每一個都有責任去入球，唔理咩位置我地都應該起腳射門。所以當我見到個波飛向我，我就唔理自己後衛嘅身份起腳，最終球真係入網！」

盧祖能夠攻入呢個致勝球，正正係因為美斯提醒過佢地唔好理自己咩位置，只要有機會就要起腳，而奇蹟就係咁而黎。雖然下場對手係實力強大嘅法國，但如果美斯能夠重新搵番「球王級」嘅狀態，並且做番領袖應該做嘅野，咁樣阿根廷仍然有力同法國一爭長短！