法國今屆世界盃成功喺決賽擊敗克羅地亞勇奪冠軍，當中超級新人麥巴比、主將基沙文、普巴等都有住不可或缺嘅作用，係球隊奪冠嘅功臣之一。不過，實際上法國陣中仲有一位無名英雄，如果無佢嘅話相信法國未必可以咁順利奪冠，佢就係防守中場簡迪(N'Golo Kante)，或者你可以叫佢干堤嘅。

簡迪可以話係目前世界最有名嘅防守中場，佢喺比賽入面總係不惜體力咁跑動為球隊協防，因此外界一直形容地球7成係被海洋覆蓋，而其餘3成則由簡迪覆蓋，可想而知佢喺球場上嘅覆蓋面究竟有幾誇張。

對於呢位隊友，一眾法國球員都對簡迪讚不絕口，好似普巴就形容對方應該有15個肺，否則無可能喺比賽入面咁樣跑法。而實際上，喺世界盃簡迪就成功最大程度減低美斯、迪布尼、蘇亞雷斯等巨星嘅作用，雖然可能大家睇唔到佢入波或有咩花巧腳法，再加上佢個人好低調，但仍然掩蓋唔到佢嘅重要性。

不過唔好睇簡迪表現咁好，其實喺世界盃開幕前幾日，佢其中一位哥哥突然離世，雖然傷心一定少不免，但係佢就好專業咁一心一意去為法國隊踢世界盃，而法國隊上下都好明白簡迪心情，並不斷安慰佢，所以喺奪得世界盃後，法國隊上下喺普巴帶領下唱歌讚美簡迪。

除此之外，喺面對克羅地亞嘅決賽前，原來簡迪有腸胃炎在身，但係佢仍然係球隊嘅正選，係直至下半場55分鐘佢先被隊友入替，所以如果唔講你知你可能只會以為佢係比賽期間受傷。

足球世界從來入波嘅球員更容易受關注，好似簡迪呢類型嘅無名英雄，其實重要性絕對比入球球員有過之而無不及，所以識波嘅你唔好吝嗇去讚美佢啦！