雖然離開曼聯轉戰關注度較低嘅美職聯，但係「呂布」伊巴謙莫域並無離開球迷們嘅視線，除左因為佢加盟洛杉磯銀河後表現出色，15場攻入12球及交出2次助攻之外，其充滿「霸氣」嘅出位言論一直未有停過，而近日佢又再一次口出狂言。

喺世界盃期間，伊巴謙莫域就曾經同碧咸喺網上媒體對賭，睇下雙方嘅國家隊邊一隊能夠勝出，最終瑞典喺八強被英格蘭踢出局，按照雙方嘅賭局，輸左嘅伊巴謙莫域要到溫布萊球場著住英格蘭波衫睇一場英格蘭比賽，期間仲要食住英國最有名嘅Fish & Chips添。當然，到而家伊巴謙莫域好似都仲未找數啦。

而日前，伊巴謙莫域被媒體問到自己如何改變美國足球文化嘅時候，呢位霸氣十足嘅「呂布」就表示：「我唔知我係咪改變左佢，我只係繼續做我嘅工作。佢地好幸運我10年前無黎呢度，否則我今日將會成為呢度嘅總統。」

伊巴謙莫域嘅言論其實都係一貫佢嘅作風，就係將自己捧到上天咁高，認為自己至高無上。而睇番數據，伊巴謙莫域目前喺美職攻入12球，排名射手榜第4位，落後第1位嘅馬天尼斯10球，但就比對方少踢7場，效率上則比對方低一點。另外，喺伊巴謙莫域嘅帶領下，球隊目前排名西岸第4位，距離榜首嘅FC達拉斯8分。

當然目前嘅美國總統係「侵侵」Donald Trump，而實際上伊巴謙莫域並唔係美國人，而其父母亦都唔係美國人，所以佢係無機會做到美國總統的。